Ketan Agrawal Murder – केतन अग्रवाल खून प्रकरणातील आरोपी सिया गोयल आणि चेतन चौधरी यांच्यात सांकेतिक भाषा, निकनेमद्वारे संवाद होत असल्याचे मोबाइलमधील डिलीट डेटा रिकव्हर केल्यानंतर समोर आले आहे. पोलिसांनी पुढील चौकशीसाठी तीन दिवसांची कोठडी मागितली. मात्र, न्यायालयाने ती फेटाळून दोघांना १४ दिवसांची न्यायालयीन कोठडी सुनावल्याने त्यांची येरवडा कारागृहात रवानगी झाली.

सिया आणि चेतनमधील संवादांचा अर्थ, त्यामागील उद्देश आणि हत्येच्या कटाशी असलेला संबंध स्पष्ट करण्यासाठी दोघांची समोरासमोर चौकशी आवश्यक असल्याचे सांगत पोलिसांनी पोलीस कोठडीची मागणी केली होती. मात्र न्यायालयाने ती फेटाळली. दोन्ही आरोपींना शुक्रवारी वडगाव मावळ न्यायालयात हजर केले. तपास अधिकारी मनोज पवार यांनी कोर्टात तपासाचा अहवाल सादर करताना

सियाने केतनचा पासपोर्ट फाडल्याचा संशय असलेल्या ठिकाणाचा पंचनामा केल्याचे आणि तिने घातलेले कपडे जप्त केल्याची माहिती दिली. सियाच्या दुसऱ्या मोबाइलच्या विश्‍लेषणानंतर सांकेतिक शब्दातील संवाद उघड झाला. प्रत्यक्षदर्शी साक्षीदारांसमोर आरोपींची ओळखपरेड व पडताळणी करावयाची असल्याचेही सांगितले. बचाव पक्षाने मात्र तपासात कोणतीही नवी बाब समोर आली नसल्याचा दावा करत पोलीस कोठडीला विरोध केला.

नार्को चाचणीला नकार
सुनावणीदरम्यान नार्को चाचणीचाही मुद्दा उपस्थित झाला. न्यायालयाने आरोपींची संमती नसताना नार्को चाचणीची परवानगी देता येत नसल्याचे स्पष्ट केले. सिया आणि चेतनने संमती न दिल्याने न्यायालयाने परवानगी नाकारली. सरकारी पक्षानेही नार्को चाचणीची आवश्यकता नसल्याचे सांगितले.