पिंपळे गुरव – कासारवाडी येथील रेल्वे क्रॉसिंग फाटक क्रमांक कायमस्वरूपी बंद करण्याच्या प्रस्तावाला स्थानिक नागरिकांनी तीव्र विरोध दर्शविला असून, या निर्णयाचा तातडीने पुनर्विचार करावा, अशी मागणी सामाजिक कार्यकर्त्या प्रतिभा रघुनाथ जवळकर यांनी खासदार श्रीरंग बारणे यांच्याकडे निवेदनाद्वारे केली आहे.

प्रतिभा जवळकर यांनी म्हटले आहे की, कासारवाडी गाव रेल्वे मार्गामुळे पूर्व आणि पश्चिम अशा दोन भागांत विभागले गेले असून, रेल्वे क्रॉसिंग फाटक हे दोन्ही भागांना जोडणारे महत्त्वाचे दुव्याचे काम करत आहे. हे फाटक कायमस्वरूपी बंद झाल्यास हजारो नागरिकांच्या दैनंदिन प्रवासावर विपरीत परिणाम होणार असून मोठ्या गैरसोयीला सामोरे जावे लागणार आहे.

कासारवाडी पश्चिम भागातील अनेक विद्यार्थी पूर्व भागातील शाळांमध्ये शिक्षण घेतात. फाटक बंद झाल्यास त्यांना मोठा वळसा घालून प्रवास करावा लागेल. त्यामुळे वेळेचा अपव्यय होण्याबरोबरच विद्यार्थ्यांच्या शिक्षणावरही परिणाम होण्याची शक्यता असल्याचे निवेदनात नमूद करण्यात आले आहे.

रेल्वे प्रशासनाशी तातडीने पाठपुरावा करून रेल्वे फाटक क्रमांक बंद करण्याच्या निर्णयाचा पुनर्विचार करावा आणि नागरिकांची गैरसोय टाळण्यासाठी आवश्यक कार्यवाही करावी, अशी मागणी प्रतिभा जवळकर यांनी खासदार श्रीरंग बारणे,आमदार शंकर जगताप यांच्याकडे केली आहे.

तसेच याबाबत आपण विधानसभा उपाध्यक्ष व स्थानिक आमदार अण्णासाहेब बनसोडे, विधान परिषद आमदार अमित गोरखे,आमदार उमा खापरे यांच्याशीही संपर्क साधून या विषयावर तोडगा काढला जावा यासाठी प्रयत्न करणार असल्याचे प्रतिभा जवळकर यांनी सांगितले.

Nhavare : निमोणे परिसरात भरदिवसा बिबट्यांचा मुक्तसंचार