विजापूर: कर्नाटकातील विजापूर जिल्ह्यातील चडचण येथील स्टेट बँक ऑफ इंडियाच्या (SBI) शाखेत मंगळवारी सायंकाळी तीन दरोडेखोरांनी धाडसी दरोडा टाकला. रोकड आणि सोन्याचे दागिने लुटून पलायन केले. खाते उघडण्याच्या बहाण्याने बँकेत प्रवेश केलेल्या या दरोडेखोरांनी कर्मचाऱ्यांना धमकावून त्यांचे हात-पाय बांधले. काय घडले घटनेत? पोलिसांनी दिलेल्या माहितीनुसार, ही घटना मंगळवारी सायंकाळी 4:30 वाजण्याच्या सुमारास घडली. तीन दरोडेखोर मास्क घालून खाते उघडण्याच्या बहाण्याने बँकेत शिरले. त्यांनी अचानक पिस्तूल आणि चाकू काढून बँक मॅनेजर आणि कॅशियरला लक्ष्य केले. त्यानंतर इतर कर्मचाऱ्यांचेही हात-पाय बांधून त्यांना असहाय्य केले. यावेळी कोणालाही बाहेर पडून मदत मागण्याची संधी मिळाली नाही. एफआयआरनुसार, दरोडेखोरांनी 1 कोटींहून अधिक रोकड आणि सुमारे 20 किलो सोन्याचे दागिने लुटले, ज्यांची किंमत जवळपास 20 कोटी रुपये आहे. महाराष्ट्राच्या दिशेने पलायन – घटनेची माहिती मिळताच विजापूरचे पोलीस अधीक्षक लक्ष्मण निंबारगी यांनी घटनास्थळी भेट देऊन तपासाला सुरुवात केली. पोलिसांनी दिलेल्या माहितीनुसार, दरोडेखोरांनी बनावट नंबरप्लेट असलेल्या सुजुकी EVA गाडीतून पलायन केले. प्राथमिक तपासात असे दिसून आले आहे की, ते महाराष्ट्रातील पंढरपूरच्या दिशेने पळाले आहेत. पोलिसांनी अनेक पथके स्थापन करून तपास तीव्र केला आहे. पोलिसांचा तपास सुरू – पोलीस अधीक्षक निंबारगी यांनी सांगितले की, दरोडेखोरांना पकडण्यासाठी सर्वतोपरी प्रयत्न सुरू आहेत. सीसीटीव्ही फुटेज आणि इतर तांत्रिक पुराव्यांच्या आधारे तपास पुढे सरकत आहे. विजापूरातील या धक्कादायक घटनेने परिसरात खळबळ उडाली असून, नागरिकांमध्ये भीतीचे वातावरण आहे.
