Karisma Kapoor: बॉलिवूड अभिनेत्री करिश्मा कपूर सध्या तिच्या नव्या ‘ब्राउन’ या वेब सीरिजमुळे चर्चेत आहे. याच दरम्यान तिने तिचे काका आणि हिंदी चित्रपटसृष्टीतील दिग्गज अभिनेते ऋषी कपूर यांच्याशी संबंधित एक खास आठवण शेअर केली आहे. ऋषी कपूर यांच्यावर चित्रित झालेल्या ‘डफली वाले’ या लोकप्रिय गाण्याचा उल्लेख करताना करिश्मा भावूक झाली.

डान्स रिअॅलिटी शो ‘इंडियाज बेस्ट डान्सर’मध्ये परीक्षक म्हणून काम करत असताना करिश्माने या गाण्याविषयीच्या आठवणी सांगितल्या. ती म्हणाली की, लहानपणी तिने ‘डफली वाले’ हे गाणे पाहण्यासाठी अनेक वेळा थिएटरमध्ये जाऊन चित्रपट पाहिला होता. आजही हे गाणे पाहिले की तिला ऋषी कपूर(Rushi Kapoor)  यांची आठवण येते आणि ती भावूक होते.

करिश्माने सांगितले की, “हे गाणे मी बालपणी मुंबईतील मेट्रो सिनेमागृहात अनेकदा पाहिले आहे. जेव्हा जेव्हा मी हे गाणे पाहते, तेव्हा मला चिंटू अंकल म्हणजेच ऋषी कपूर यांची आठवण येते. या गाण्यात त्यांनी ज्या पद्धतीने डफली वाजवली आहे, ती आजही माझ्या मनात कायम आहे.”   (Karisma Kapoor)

या कार्यक्रमात करिश्मासोबत परीक्षक असलेले अभिनेता आणि नृत्यदिग्दर्शक जावेद जाफरी यांनीही ऋषी कपूर यांच्याविषयीच्या भावना व्यक्त केल्या. ते म्हणाले की, ते ऋषी कपूर यांचे मोठे चाहते आहेत. पडद्यावर एखादे वाद्य इतक्या आत्मविश्वासाने आणि सहजतेने सादर करणारे कलाकार फार कमी असतात. ‘डफली वाले’ गाण्यात ऋषी कपूर यांनी डफली ज्या प्रकारे वाजवली आहे, ती पाहताना ते खरोखरच हे वाद्य वाजवत असावेत असे वाटते.  (Karisma Kapoor)

ही चर्चा कार्यक्रमातील स्पर्धक गीतांजली हिने १९७९ मधील सुपरहिट ‘सरगम’ चित्रपटातील ‘डफली वाले’ या गाण्यावर सादरीकरण केल्यानंतर रंगली. या गाण्यात ऋषी कपूर आणि जया प्रदा यांची जोडी प्रेक्षकांना पाहायला मिळाली होती.  (Karisma Kapoor)

या गाण्याला भारतरत्न लता मंगेशकर आणि मोहम्मद रफी यांनी स्वर दिले होते. प्रसिद्ध संगीतकार जोडी लक्ष्मीकांत-प्यारेलाल यांनी या गाण्याला संगीत दिले होते, तर गीतकार आनंद बक्षी यांनी त्याचे बोल लिहिले होते. प्रदर्शित झाल्यानंतर हे गाणे प्रचंड लोकप्रिय झाले आणि आजही ते रसिकांच्या आवडत्या गाण्यांपैकी एक मानले जाते.  (Karisma Kapoor)

दरम्यान, करिश्मा कपूरची ‘ब्राउन’ ही वेब सीरिज ५ जून रोजी ओटीटी प्लॅटफॉर्मवर प्रदर्शित झाली आहे. या मालिकेत करिश्मासोबत सूर्या शर्मा, जीशू सेनगुप्ता, सोनी राजदान, हेलेन खान, शान, परेश पाहुजा आणि अजिंक्य देव यांच्याही महत्त्वाच्या भूमिका आहेत. या मालिकेचे दिग्दर्शन अभिनय देव यांनी केले आहे.