Rahul Roy: ९०च्या दशकात आपल्या दमदार अभिनयाने आणि देखण्या व्यक्तिमत्त्वाने प्रेक्षकांच्या मनावर राज्य करणारा अभिनेता म्हणजे राहुल रॉय. ‘आशिकी’ या चित्रपटामुळे राहुल रॉयला प्रचंड लोकप्रियता मिळाली. या चित्रपटातील त्यांच्या भूमिकेने त्यांना रातोरात स्टार बनवलं. मात्र, २०२० मध्ये आलेल्या ब्रेन स्ट्रोकनंतर त्यांच्या आयुष्यात मोठा बदल झाला. आता या कठीण काळानंतरच्या प्रवासाबद्दल राहुल रॉय यांनी मनमोकळेपणाने भाष्य केलं आहे.

एका मुलाखतीत राहुल रॉय यांनी त्यांच्या आरोग्याबाबत आणि सध्याच्या आयुष्याबद्दल अनेक गोष्टी सांगितल्या. २०२० मध्ये कारगिलमध्ये एका चित्रपटाचं शूटिंग करत असताना त्यांना ब्रेन स्ट्रोक आला होता. त्यानंतर त्यांच्या बोलण्यावर परिणाम झाला. संवाद म्हणताना आणि बोलताना त्यांना अडचणींचा सामना करावा लागला. या काळात चित्रपटाचे दिग्दर्शक करणवीर यांनी त्यांना मोठी साथ दिल्याचं राहुल यांनी सांगितलं.

ब्रेन स्ट्रोकनंतर आयुष्यच बदललं  (Rahul Roy)

ब्रेन स्ट्रोकनंतर आपल्या आयुष्यात अनेक बदल झाले, असं राहुल रॉय यांनी सांगितलं. या घटनेनंतर त्यांनी धूम्रपान पूर्णपणे सोडलं. तसंच त्यांनी आपल्या आहारातही मोठे बदल केले. सध्या ते व्हिगन आहार घेतात. त्यासोबतच जैन पद्धतीचं अन्नही घेत असल्याचं त्यांनी सांगितलं.

राहुल यांच्या म्हणण्यानुसार, ते कांदा आणि लसूण खात नाहीत. दूधही घेत नाहीत. सध्या त्यांना दररोज जवळपास आठ प्रकारची औषधं घ्यावी लागतात. मात्र, पूर्वीच्या तुलनेत आता त्यांची प्रकृती बरीच सुधारली असल्याचं त्यांनी स्पष्ट केलं.

ब्रेन स्ट्रोकनंतरचा सुरुवातीचा काळ त्यांच्यासाठी खूप कठीण होता. पुन्हा चालता येईल का, व्यवस्थित बोलता येईल का, असे प्रश्न त्यांच्या मनात निर्माण झाले होते. मात्र, या कठीण परिस्थितीतही त्यांनी हार मानली नाही. उपचार आणि प्रयत्नांमुळे आता ते पुन्हा कामाकडे वळत आहेत.

“शेवटच्या श्वासापर्यंत काम करायचं आहे”

राहुल रॉय यांनी आपल्या कामाबद्दलही स्पष्ट भूमिका मांडली. सध्या काही कायदेशीर प्रकरणं सुरू असून त्यातून बाहेर पडण्यासाठी आपल्याला काम करत राहण्याची गरज असल्याचं त्यांनी सांगितलं. त्यामुळे कुणाला आपली मदत करायची असेल, तर आर्थिक मदतीऐवजी काम द्यावं, अशी भावनिक विनंती त्यांनी केली.

“मला काही मदत करायची असेल, तर मला काम द्या. मला शेवटच्या श्वासापर्यंत काम करायचं आहे,” अशी भावना राहुल यांनी व्यक्त केली. काम केल्यामुळे आपलं मन चांगलं राहतं आणि आपल्याला सकारात्मक राहण्यास मदत होते, असंही त्यांनी सांगितलं.

पुन्हा रुपेरी पडद्यावर झळकणार

ब्रेन स्ट्रोकनंतर काही काळ आरोग्याच्या समस्यांशी झुंज दिल्यानंतर राहुल रॉय पुन्हा अभिनयाच्या क्षेत्रात सक्रिय झाले आहेत. ते लवकरच ‘सुपर बादशाह’ या चित्रपटात दिसणार असल्याचं सांगितलं जात आहे.

‘आशिकी’मधून घराघरात पोहोचलेल्या राहुल रॉय यांनी त्यानंतर ‘जुनून’, ‘फिर तेरी कहानी याद आई’, ‘गुमराह’ आणि ‘प्यार का साया’ यांसारख्या चित्रपटांमध्ये काम केलं. याशिवाय ते हिंदी ‘बिग बॉस’च्या पहिल्या पर्वाचे विजेतेही ठरले होते.

नोव्हेंबर २०२० मध्ये ‘एलएसी – लाइव्ह द बॅटल’ या चित्रपटाच्या कारगिलमधील शूटिंगदरम्यान त्यांना ब्रेन स्ट्रोक आला होता. या घटनेनंतर त्यांच्या बोलण्यावर परिणाम झाला. मात्र, अनेक अडचणींवर मात करत राहुल रॉय पुन्हा कामाकडे वळत आहेत. त्यांचा हा प्रवास त्यांच्या चाहत्यांसाठी नक्कीच भावनिक आणि प्रेरणादायी ठरत आहे.