Karad Crime News : मलकापूर (ता. कराड) गावच्या हद्दीत अवैध वेश्या व्यवसाय चालविणाऱ्या हॉटेल अयोध्या लॉजिंगवर डीवायएसपी पथक व कराड शहर पोलिसांनी शुक्रवारी छापा टाकला. यामध्ये वेश्या व्यवसाय करणाऱ्या चार महिलांना ताब्यात घेण्यात आले असून त्यातील एक महिला बांगलादेशी असल्याचे निष्पन्न झाले आहे. त्यामुळे कराडात अजूनही बांगलादेश नागरिक वास्तव्यास असल्याचे सिद्ध झाले आहे. याप्रकरणी पोलिसांनी लॉज चालकावरही गुन्हा दाखल केला आहे. अक्षय शरद पुजारी (वय 27, रा. कमळेश्वर मंदिर मंगळवार पेठ, कराड) असे गुन्हा दाखल झालेल्या लॉज चालकाचे नाव आहे. याबाबत पोलिसांनी दिलेली माहिती अशी, मलकापूरच्या हद्दीत अवैध वेश्या व्यवसाय सुरू असल्याची माहिती उपअधीक्षक राजश्री पाटील यांना मिळाली होती. त्या माहितीच्या आधारे उपअधीक्षक राजश्री पाटील यांनी निर्भया पथक, उपअधिक्षक पथक व शहर पोलिसांना कारवाई करण्याच्या सूचना दिल्या. सहाय्यक पोलीस निरीक्षक श्रद्धा आंबले, अमित बाबर, गुन्हे प्रकटीकरण शाखेचे पोलीस उपनिरीक्षक निखिल मगदूम यांनी एक बनावट ग्राहक हॉटेल अयोध्या लॉजिंग येथे पाठवून दिले असता तेथे अवैध व्यवसाय सुरू असल्याची पोलिसांना खात्री झाली. पोलिसांनी लगेच तेथे छापा टाकला असता लॉजिंगचा चालक अक्षय पुजारी तेथील व्यवहार पाहत असल्याचे लक्षात आले. पोलिसांनी लॉजमधील रूमची झडती घेतली असता तेथील रूममध्ये चार महिला मिळून आल्या. त्यापैकी एक महिला बांगलादेशी असल्याचे पोलिस तपासात निष्पन्न झाले. पोलिसांनी बांगलोदशी महिलेकडील दोन मोबाइल, आधारकार्ड असा मुद्देमाल जप्त केला आहे. अधिक तपास पोलीस करीत आहेत. बांगलादेशी महिलेकडे दुसऱ्या नावाने आधारकार्ड मलकापूर येथील लॉजमध्ये अवैध वेश्या व्यवसाय करणाऱ्या महिला सापडल्या असून त्यामध्ये एका बांगलादेशी महिलेचा समावेश आहे. ती मूळची बांगलादेशी आहे. तिने मुंबई येथून दुसऱ्या नावाने आधारकार्ड तयार करून ती कराडमध्ये वास्तव्य करीत असल्याची धक्कादायक माहिती पोलिस तपासात स्पष्ट झाली आहे. पोलिसांनी खाक्या दाखवताच तिने तिचे मूळ नावाची कबुली दिली आहे. त्यामुळे कराडमध्ये अजून किती बांगलादेशी सापडणार आहेत हे पाहणे गरजेचे आहे.
