Karad News : शहरातील मुख्य बाजारपेठेत असलेल्या सोने- चांदीच्या दुकानातून दीड किलो सोन्यासह तब्बल दीड कोटीचा ऐवज चोरीला गेल्याची तक्रार एका सराफाने पोलिसांकडे केली. पोलिसांनीही तातडीने तपास सुरू केला. मात्र, घटनास्थळावरील परिस्थिती आणि सराफाची तक्रार यामध्ये विसंगती आढळल्याने पोलिसांनी सराफावर प्रश्नांची सरबत्ती केली. अखेर पोलिसी खाक्या दाखविताच देणेकरांकडून सुटका मिळविण्यासाठी हा बनाव रचल्याची कबुली सराफाने दिली. पोलिसांकडून मिळालेल्या माहितीनुसार, शहरातील मुख्य बाजारपेठेत एका सराफाचे ज्वेलर्स शॉप आहे. संबंधित सराफाने सकाळच्या सुमारास कराड शहर पोलीस ठाणे गाठले. दुकानातून दीड किलो सोने, कित्येक किलो चांदी तसेच लाखोंची रक्कम चोरीस गेल्याचे त्याने पोलिसांना सांगितले. एवढ्या मोठ्या चोरीच्या घटनेमुळे पोलिसही हादरले. वरिष्ठ पोलीस निरीक्षक दत्तात्रय दराडे यांनी तातडीने गुन्हे शाखेचे उपनिरीक्षक निखिल मगदूम यांच्यासह पथकाला तपासाच्या सुचना दिल्या. त्यानुसार उपनिरीक्षक मगदूम यांच्यासह गुन्हे शाखेचे कर्मचारी संबंधित सराफाच्या ज्वेलर्स शॉपमध्ये गेले. संबंधित शॉप कुलूपबंद होते. तसेच ज्या तिजोरीतून ऐवज चोरीला गेल्याचे सराफ सांगत होता, ती तिजोरीही कुलूपबंद होती. तसेच त्या तिजोरीला पासवर्ड होता. जो पासवर्ड केवळ सराफालाच माहिती होता. शॉपमध्ये जबरदस्तीने प्रवेश केल्याचे तसेच कसलीही तोडफोड किंवा नासधूस केल्याचे दिसून येत नव्हते. त्यामुळे पोलिसांचा संशय बळावला. वरिष्ठ पोलीस निरीक्षक दत्तात्रय दराडे, गुन्हे शाखेचे उपनिरीक्षक निखिल मगदूम यांनी त्या सराफाकडेच सखोल चौकशी सुरू केली. त्याच्यावर प्रश्नांची सरबत्ती करीत पोलिसी खाक्या दाखविला. अखेर चोरीचा बनाव केल्याची कबुली सराफाने दिली. अनेकांचे पैसे तसेच दागिने द्यायचे असून देणेकर्यांपासून सुटका मिळविण्यासाठी हा बनाव केल्याचे त्याने सांगितले. पोलिसांना खोटी माहिती देऊन दिशाभूल केल्याप्रकरणी संबंधित सराफावर पोलिसांकडून कायदेशीर कारवाई करण्यात आली आहे.
