मुंबई : बॉलिवूड अभिनेत्री कंगना राणौत यांनी त्यांच्या ‘इमर्जन्सी’ या चित्रपटात आम्ही सुचवलेले बदल आणि काटछाट करण्यास सहमती दर्शवली आहे. हा चित्रपट 1975 मध्ये तत्कालीन पंतप्रधान इंदिरा गांधी यांनी जाहीर केलेल्या आणीबाणीवर आधारित आहे. या चित्रपटात बॉलिवूड अभिनेत्री कंगना राणौत यांनी इंदिरा गांधी यांची भूमिका साकारली असून त्या या चित्रपटाच्या सहनिर्मात्यासुद्धा आहेत. मागच्या काही दिवसांपासून हा चित्रपट मोठ्या प्रमाणात वादाच्या भोवऱ्यात सापडला होता.
सेन्सॉर बोर्डाकडून प्रमाणपत्र मिळत नसल्याने निर्मात्यांनी उच्च न्यायालयात धाव घेतली होती. त्यानंतर सेन्सॉर बोर्डाने या चित्रपटात काही कट्स आणि बदल सुचवले असून आता त्याला कंगना यांनी सहमती दर्शवली आहे. शीख संघटनांनी कंगना राणौत यांच्या या चित्रपटावर आक्षेप घेतला आहे. ‘इमर्जन्सी’ या चित्रपटात शीख संघटनांना चुकीच्या पद्धतीने दाखवण्यात आलं असून या समुदायाची प्रतिमा मलिन करण्याचा प्रयत्न केल्याचा आरोप त्यांनी केला होता. सेन्सॉर बोर्डाने ‘इमर्जन्सी’ या चित्रपटात एकूण 13 बदल सुचवले आहेत. यामध्ये 6 गोष्टींचा समावेश, 4 गोष्टी वगळण्यास आणि 3 बदल सुचवण्यात आले आहेत.
सेन्सॉर बोर्डाने सुचवलेले बदल
1) चित्रपटात शीख समुदायाबद्दल केलेल्या चित्रणाबाबत शीख गटांनी उपस्थित केलेल्या चिंतेचा विचार सेन्सॉर बोर्डाच्या समितीने केला.
2) सेन्सॉर बोर्डाने निर्मात्यांना चित्रपटाच्या सुरुवातीला ‘डिस्क्लेमर’ ठेवण्याची विनंती केली. हा चित्रपट सत्य घटनांपासून प्रेरित आहे आणि त्यात काही नाट्यमय परिवर्तन करण्यात आले आहेत, अशा आशयाचं डिस्क्लेमर ठेवण्याची विनंती केली.
3) सेन्सॉर बोर्डाने संजय गांधी आणि गियानी झैल सिंह यांच्यातील एका विशिष्ट संवादातून ‘संत’ आणि ‘भिंद्रनवाले’ हे शब्द काढून टाकण्याची शिफारस केली आहे.
4) माजी पंतप्रधान आणि भारतीय लष्करातील उच्चपदस्थ यांच्यातील संवाद हटविण्याची मागणी बोर्डाने केली.
5) तसंच चित्रपट निर्मात्यांना शीख अतिरेकी जर्नल सिंग भिंद्रनवाले यांचं कौतुक केलं जाणारं वाक्य हटविण्यास सांगितलं. निर्मात्यांना अशी दृश्ये आणि संवाद काढून टाकण्यास सांगितलं गेलंय, जे बिगर-शीखांना लक्ष्य करतात.
6) सेन्सॉर बोर्डाने निर्मात्यांना ‘खलिस्तान’चा संदर्भ देणारा संवाद आणि शिखांचं चित्रण केलेल्या काही दृश्यांना सौम्य करण्यास सांगितलं आहे.
7) निर्मात्यांनी चित्रपटात जिथे जिथे वास्तविक फुटेज वापरले आहेत, तिथे मजकुराच्या स्वरुपात ‘रिअल फुटेज’ म्हणून उल्लेख करावा.
8) बोर्डाने निर्मात्यांना चित्रपटात नमूद केलेली सर्व आकडेवारी, विधानं आणि संदर्भांचा कागदोपत्री पुरावा सादर करण्यास सांगितले आहे.
