K.Abdul Jabbar : दावणगेरे दक्षिण विधानसभा पोटनिवडणुकीत पक्षविरोधी कारवाया केल्याबद्दल कर्नाटक काँग्रेसने विधान परिषद सदस्य के. अब्दुल जब्बार (K.Abdul Jabbar) यांच्यावर कडक कारवाई केली आहे.

प्रदेशाध्यक्ष डी. के. शिवकुमार यांनी जब्बार यांना पक्षाच्या प्राथमिक सदस्यत्वातून तात्काळ निलंबित केले असून, यापूर्वीच त्यांचा अल्पसंख्याक विभागाच्या अध्यक्षपदाचा राजीनामा स्वीकारला आहे.

दिवंगत नेते शमनूर शिवशंकरप्पा यांचे नातू समर्थ मल्लिकार्जुन यांना तिकीट दिल्याने जब्बार नाराज होते. त्यांनी स्वतः या जागेसाठी प्रयत्न केले होते. त्यांनी आणि इतर काही नेत्यांनी समर्थ यांच्या विरोधात ‘अंतर्गत कट’ रचला आणि काँग्रेसने अल्पसंख्याकांचा विश्वासघात केल्याची मोहीम राबवली असल्याचा त्यांच्यावर आरोप होता.

मुख्यमंत्र्यांचे राजकीय सचिव नसीर अहमद यांनाही यापूर्वीच पदावरून मुक्त करण्यात आले आहे. पक्षातील एका गटाने असा दावा केला आहे की, या नेत्यांनी छुपी रीतने एसडीपीआय उमेदवाराला मदत केली. उपमुख्यमंत्री शिवकुमार यांनी स्पष्ट केले की, पक्षशिस्त सर्वोच्च असून बंडखोर उमेदवारांना माघार घ्यायला लावण्यात हे नेते अपयशी ठरले.

या कारवाईमुळे मंत्री झमीर अहमद खान यांच्यावरही भविष्यात कारवाई होण्याची शक्यता वर्तवली जात असून, मुस्लिम मतांच्या विभाजनामुळे भाजपला फायदा होण्याची भीती काँग्रेसला सतावत आहे.