Jyoti Waghmare – उद्धव ठाकरे शिवसेना गटाचे खासदार संजय राऊत आता ठाकरे गटाचे प्रवक्ते राहिलेले नसून, काँग्रेसची राजकीय सुपारी घेऊन उपमुख्यमंत्री एकनाथ शिंदे यांच्यावर टीका करणारे सुपारीबाज प्रवक्ते बनल्याचा आरोप शिवसेनेच्या प्रवक्त्या आणि खासदार डॉ. ज्योती वाघमारे यांनी पत्रकार परिषदेत केला. यावेळी शिवसेना पुणे शहर प्रमुख प्रमोद भानगिरे उपस्थित होते.

ठाकरे गटातील नेते पक्षातील असुरक्षितता, खंबीर नेतृत्वाचा अभाव आणि संजय राऊत यांच्याकडून होणारा सततचा अपमान याला वैतागून पक्ष सोडत असल्याचा आरोप करत वाघमारे म्हणाल्या, राऊत यांच्या विषारी आणि अहंकारयुक्त भाषेमुळेच ठाकरे पक्षाची वैचारिक दिवाळखोरी उघडी पडली आहे. ऑपरेशन उबाठा बुडवा हे विरोधकांनी किंवा सत्ताधाऱ्यांनी सुरू केलेले नाही, तर स्वतः संजय राऊत यांनीच बेताल विधानांद्वारे केले आहे.

रोज सकाळच्या पत्रकार परिषदांमधून ते पक्षाची प्रतिमा खालावत आहेत. राज्यातील विकासावर किंवा जनतेच्या प्रश्नांवर बोलण्याऐवजी वैयक्तिक पातळीवर जाऊन चिखलफेक करणे आणि महिलांबद्दल अवमानकारक भाषा वापरणे हीच राऊत यांची ओळख बनली आहे. उपमुख्यमंत्री एकनाथ शिंदे यांच्या नेतृत्वाखाली सुरू असलेल्या विकासकामांना विरोधकांकडे कोणतेही उत्तर नाही.

या विकासकामांच्या धसक्यामुळे राऊत निराधार विधाने करत आहेत. जनतेने नाकारलेले नेतृत्व आता जनतेला काय मार्गदर्शन करणार असा प्रश्न वाघमारे यांनी उपस्थित केला. स्वतःच्या खासदारांना सांभाळता आले नाही आणि आता त्यांच्याच मतदारसंघात जाऊन दौरे करणे हा केवळ एक राजकीय दिखावा आहे, असा टोलाही त्यांनी लगावला.