Sharvari Wagh: बॉलिवूड अभिनेत्री शर्वरी वाघ सध्या तिच्या आगामी ‘अल्फा’ या चित्रपटामुळे चर्चेत आहे. हा चित्रपट 3 जुलै 2026 रोजी जगभरातील चित्रपटगृहांमध्ये प्रदर्शित होणार आहे. चित्रपटाच्या प्रदर्शनाला अवघे दोन दिवस शिल्लक असताना शर्वरीने सोशल मीडियावर तिच्या वर्कआउटचे काही खास फोटो शेअर केले आहेत. या फोटोंसोबत तिने दिलेल्या कॅप्शनमुळे चित्रपटाबद्दलचा तिचा उत्साहही चाहत्यांसमोर आला आहे.

शर्वरीने तिच्या अधिकृत सोशल मीडिया अकाउंटवर जिममधील अनेक फोटो पोस्ट केले आहेत. या फोटोंमध्ये ती डंबेल्ससह व्यायाम करताना, ताकद वाढवण्यासाठी विविध व्यायाम प्रकार करताना आणि फिटनेसवर मेहनत घेताना दिसत आहे. ब्राऊन रंगाच्या स्पोर्ट्सवेअरमध्ये तिचा साधा पण आत्मविश्वासपूर्ण लूक चाहत्यांच्या पसंतीस उतरला आहे. चित्रपटातील अॅक्शन भूमिकेसाठी तिने घेतलेली मेहनत या फोटोंमधून स्पष्ट दिसते.

हे फोटो शेअर करताना शर्वरीने लिहिले, “मोठ्या दिवसापूर्वी आठवड्याच्या मध्यातील मोटिव्हेशन! ‘अल्फा’च्या रिलीजला आता फक्त दोन दिवस बाकी आहेत.” या कॅप्शनमधून चित्रपटाच्या प्रदर्शनाची ती आतुरतेने वाट पाहत असल्याचे दिसून येते.

शर्वरीच्या या पोस्टवर चाहत्यांनी भरभरून प्रतिक्रिया दिल्या आहेत. अनेकांनी तिच्या फिटनेसचे आणि मेहनतीचे कौतुक केले आहे. एका चाहत्याने, “तुझी फिटनेस कमाल आहे,” अशी प्रतिक्रिया दिली. तर दुसऱ्याने, “तू खूप मजबूत आहेस,” असे म्हणत तिच्या मेहनतीचे कौतुक केले. आणखी एका चाहत्याने, “हे सोपे नाही, यासाठी खूप मेहनत लागते,” असे म्हणत तिच्या समर्पणाला दाद दिली. सोशल मीडियावर या पोस्टला मोठ्या प्रमाणात लाईक्स आणि कमेंट्स मिळत आहेत.

‘अल्फा’ हा यशराज फिल्म्सच्या स्पाय युनिव्हर्समधील पुढील महत्त्वाचा चित्रपट आहे. या चित्रपटात आलिया भट्ट आणि शर्वरी वाघ प्रथमच अॅक्शन भूमिकांमध्ये दिसणार आहेत. त्यांच्यासोबत अनिल कपूर आणि बॉबी देओल यांच्याही महत्त्वाच्या भूमिका आहेत. दमदार अॅक्शन, थरार आणि वेगळ्या कथानकामुळे या चित्रपटाची प्रेक्षकांमध्ये मोठी उत्सुकता आहे.

चित्रपटाचा ट्रेलर प्रदर्शित झाल्यापासून ‘अल्फा’ची चर्चा सुरू आहे. महिला गुप्तहेरांच्या भूमिकांवर आधारित हा चित्रपट यशराजच्या स्पाय युनिव्हर्समध्ये एक वेगळा टप्पा मानला जात आहे. शर्वरी आणि आलिया यांनी या चित्रपटासाठी विशेष अॅक्शन प्रशिक्षण घेतले असून, त्यांचे अनेक स्टंट त्यांनी स्वतः साकारल्याचेही बोलले जात आहे. त्यामुळे या दोघींच्या अॅक्शन सीन्सकडे चाहत्यांचे विशेष लक्ष लागले आहे.

शर्वरीने गेल्या काही वर्षांत तिच्या अभिनयासोबतच फिटनेस आणि मेहनतीच्या जोरावर बॉलिवूडमध्ये वेगळी ओळख निर्माण केली आहे. प्रत्येक भूमिकेसाठी ती स्वतःला पूर्णपणे तयार करत असल्याचे अनेकदा दिसून आले आहे. ‘अल्फा’साठीही तिने कठोर मेहनत घेतली असून, तिच्या ताज्या वर्कआउट फोटोंमधून त्याची झलक पाहायला मिळते.

 

आता 3 जुलै रोजी ‘अल्फा’ चित्रपट प्रेक्षकांच्या भेटीला येणार असून, शर्वरी वाघचा दमदार अॅक्शन अवतार मोठ्या पडद्यावर पाहण्यासाठी चाहते उत्सुक आहेत.