जुन्नर: राष्ट्रीय लोक न्यायालयात १३ सप्टेंबर रोजी ओझर-जुन्नर येथे एक कौतुकास्पद उपक्रम राबवण्यात आला. ड्रंक अँड ड्राइव्ह प्रकरणातील आरोपींना आर्थिक दंडासोबतच प्रत्येकी दोन वृक्ष लावण्याचा आदेश देण्यात आला.

जिल्हा न्यायाधीश नायर यांच्या मार्गदर्शनाखाली दिवाणी न्यायाधीश (वरिष्ठ स्तर) हुसेन, सहदिवाणी न्यायाधीश अनंत बाजड, स्वप्ना घुले आणि श्रेया जैन यांनी पॅनल जज म्हणून काम पाहिले. अनंत बाजड यांनी नाविन्यपूर्ण संकल्पना राबवत मोटार वाहन कायद्याच्या कलम १८५ अंतर्गत (ड्रंक अँड ड्राइव्ह) प्रकरणात ‘प्ली बार्गेनिंग’चा वापर केला. यामुळे १०,००० रुपये दंडाऐवजी २,५०० रुपये दंड आकारून नारायणगाव (२२ खटले), ओतूर (१५ खटले), आळेफाटा (१० खटले) आणि जुन्नर (३ खटले) पोलिस स्टेशनमधील एकूण ५० खटले निकाली काढण्यात आले. यातून १,२५,००० रुपये दंड वसूल करण्यात आला.

विशेष म्हणजे, आरोपींना आर्थिक दंडासोबत पर्यावरण संवर्धनासाठी जुन्नर वन परिक्षेत्रात वनखात्याच्या परवानगीने वड, पिंपळ, चिंच, कडुलिंब, बेल, उंबर अशा पर्यावरणपूरक वृक्षांचे प्रत्येकी दोन वृक्ष लावण्याचा आदेश देण्यात आला. या उपक्रमातून लवकरच १०० वृक्षांचे रोपण होणार आहे. या निर्णयाने न्यायालयाने न्यायदानासोबत पर्यावरण संरक्षणाप्रती कटिबद्धता दर्शवली आहे.