Junnar News – सध्या गॅस सिलिंडरचे सतत वाढणारे दर आणि जागतिक पातळीवरील अमेरिका, इराण व इस्रायल यांच्यातील युद्धजन्य परिस्थितीमुळे निर्माण झालेली गॅस टंचाई, यामुळे ग्रामीण भागात पुन्हा एकदा पारंपरिक मातीच्या चुली पेटू लागल्या आहेत. गॅसची बचत करण्यासाठी आणि चुलीवरच्या जेवणाची चव टिकवण्यासाठी अनेक कुटुंबांनी आता चुलीला पसंती दिली आहे. आधुनिक उपकरणांच्या युगातही जुन्नर तालुक्यातील बोरी बुद्रुक येथील राजेंद्र ज्ञानेश्वर जाधव यांनी आपली चाळीस वर्षांची चूल बनवण्याची कला जोपासली असून, गेल्या काही दिवसांत त्यांच्याकडे चुलींची मागणी मोठ्या प्रमाणावर वाढली आहे. बोरी बुद्रुक येथील राजेंद्र जाधव हे गेल्या चार दशकांपासून हा व्यवसाय करत आहेत. त्यांचे वडील ज्ञानेश्वर रामभाऊ जाधव यांनी साठ ते सत्तर वर्षांपूर्वी हे काम सुरू केले होते, तीच परंपरा राजेंद्र यांनी पुढे चालू ठेवली आहे. आजही ते स्वतः मातीच्या चुली बनवून गावोगावी त्यांची विक्री करत आहेत. गॅस टंचाई संकटामुळे ज्यांच्याकडे गॅस कनेक्शन आहे, त्यांनीही खबरदारी म्हणून घराबाहेर किंवा ओट्यावर चुली बसवून घेण्यास सुरुवात केली आहे. यामुळे अनेक वर्षांनंतर ग्रामीण भागात पुन्हा एकदा चुलीचा धूर दिसू लागला असून, मातीच्या चुली बनवणाऱ्या कारागिरांना सुगीचे दिवस आले आहेत. कच्च्या मालाचा तुटवडा आणि भाववाढ सध्या एका मातीच्या चुलीला दीडशे ते दोनशे रुपये दर मिळत आहे. चुलींना मागणी वाढली असली तरी हे काम करण्यासाठी कामगारांची मोठी कमतरता भासत आहे. तसेच चूल बनवण्यासाठी लागणारी माती मिळवणेही कठीण झाले आहे. या अडचणींमुळे भविष्यात मातीच्या चुलींच्या किमतीत आणखी वाढ होण्याची शक्यता कारागिरांनी व्यक्त केली आहे. “दीडशे रुपये ते दोनशे रुपये मातीच्या चुलीला सध्या दर मिळत आहे. सध्या चुलीला मागणी वाढली आहे. कामगारांची कमतरता आम्हाला सध्या जाणवत आहे. तसेच चुली बनवण्यासाठी मातीचाही तुटवडा आहे. त्यामुळे भविष्यात दर वाढ होण्याची शक्यता आहे.” – राजेंद्र जाधव, कुंभार
