प्रभात वृत्तसेवा
ओझर – जुन्नर येथे दि. १३ सप्टेंबर रोजी पार पडलेल्या राष्ट्रीय लोक न्यायालयामध्ये ड्रंक अँड ड्राईव्ह केसेस मधील आरोपींना आर्थिक दंडासोबतच प्रत्येकी दोन वृक्ष लावण्याचा आदेश देण्यात आला.या राष्ट्रीय लोक न्यायालयामध्ये जिल्हा न्यायाधीश श्रीमती नायर यांच्या मार्गदर्शनाखाली दिवाणी न्यायाधीश वरिष्ठ स्तर हुसेन, सह दिवाणी न्यायाधीश अनंत बाजड, श्रीमती स्वप्ना घुले व श्रीमती श्रेया जैन यांनी पॅनल जज म्हणून काम पाहिले.

यामध्ये अनंत बाजड यांनी नवीन संकल्पना राबवत मोटार वाहन कायद्याचे कलम १८५ ( ड्रंक अँड ड्राईव्ह) प्रमाणे शिक्षा पात्र गुन्ह्यामध्ये शिक्षे बाबतचा सौदा (प्ली बारगेनिंग) चा वापर करून सदर गुन्ह्यामध्ये (ड्रंक अँड ड्राईव्ह केसेस मधील) आरोपींना १० हजार/-रुपये दंड ऐवजी २ हजार ५०० रुपये दंड करून नारायणगाव पोलीस ठाणे २२ केसेस, ओतूर पोलीस ठाणे १५ केसेस, आळेफाटा पोलीस ठाणे १० केसेस व जुन्नर पोलीस ठाणे ३ केसेस असे एकूण ५० खटले निकाली काढून आरोपींकडून एकूण १ लाख २५ हजार रुपये आर्थिक दंड वसूल करण्यात आला आहे.

महत्वाचे म्हणजे यातील आरोपींना आर्थिक दंड करण्यासोबतच पर्यावरणाची सेवा म्हणून आरोपीने वनखात्याच्या परवानगीनुसार जुन्नर वन परीक्षेत्रामध्ये वड, पिंपळ, चिंच, कडुलींब, बेल, उंबर असे प्रत्येकी दोन वृक्ष लावण्याचा आदेश देखील देण्यात आला आहे. या पद्धतीने न्यायालयाच्या पर्यावरण कटीबद्धतेचाही प्रत्यय आला. याद्वारे लवकरच एकूण शंभर वृक्ष लावण्यात येणार आहेत.