Ozar News : आजच्या धावपळीच्या आणि आत्मकेंद्री युगात वृद्ध मातापित्यांकडे दुर्लक्ष करणाऱ्या मुलांची संख्या वाढत असताना, जुन्नर तालुक्याच्या (Ozar News) पश्चिम पट्ट्यातील खानगाव येथे घडलेल्या एका अनोख्या घटनेने सर्वांच्या डोळ्यांत आनंदाश्रू उभे केले. ‘मातृ-पितृ सेवा हाच खरा मानवता धर्म’ या उक्तीचा प्रत्यय रविवारी, ६ सप्टेंबर २०२६ रोजी संपूर्ण पंचक्रोशीने अनुभवला.

खानगाव येथील जुन्या पिढीतील प्रगतीशील शेतकरी व जुन्नरचे (Ozar News) प्रसिद्ध कांदा व्यापारी कै. बबन बोंबले यांच्या पत्नी हौसाबाई बबन बोंबले (वय ९० वर्षे) यांचे नुकतेच वृद्धापकाळाने निधन झाले. त्यांच्या पश्चात शांताराम, जालिंदर, विजय ही तीन मुले आणि इंदुमती बोऱ्हाडे, लक्ष्मी शिंदे, निर्मला काळे या तीन मुली असा सहा भावंडांसह नातवंडे व पतवंडांचा मोठा परिवार आहे.

व्यवसाय आणि नोकरीनिमित्त शांताराम व जालिंदर हे जुन्नर आणि नारायणगाव शहरात स्थायिक असले तरी त्यांचे आपल्या वृद्ध आईवडिलांकडे सातत्याने बारीक लक्ष असायचे. तर खानगावात शेती सांभाळणारे पत्रकार विजय बोंबले, त्यांची पत्नी ज्योती आणि नातू संकेत यांनी आजारपणात दोन्ही वृद्ध जिवांची पोटच्या पोराप्रमाणे अहोरात्र सेवा केली. सासूला स्वतःच्या आईप्रमाणे मानून तिची शेवटपर्यंत केलेली शुश्रूषा संपूर्ण गावाने जवळून पाहिली होती.

याच सेवेची कृतज्ञता म्हणून हौसाबाई यांच्या दशक्रिया विधीच्या दिवशी खानगावच्या वैकुंठभूमीत एक आगळावेगळा प्रसंग घडला. उपस्थित जनसमुदायाच्या साक्षीने शिवसेना उपतालुका प्रमुख संतोष चव्हाण व समस्त खानगाव ग्रामस्थांच्या वतीने उपसरपंच सुभाष कामटकर आणि चंद्रकांत काजळे यांनी बोंबले कुटुंबीयांना ‘उत्कृष्ट मातृ-पितृ सेवा पुरस्कार’ देऊन सर्वांसमक्ष सन्मानित केले. स्मशानभूमीसारख्या गंभीर ठिकाणी मुलांच्या या निस्वार्थ सेवेचा गौरव होताच उपस्थित जनसागर भावूक झाला.

याप्रसंगी (Ozar News) प्रवचनकार ह.भ.प. सुरेखा शिंदे यांनी मानवी जीवनातील आईवडिलांचे महत्त्व संत विचारांच्या दाखल्यांसह विशद करून उपस्थितांना मंत्रमुग्ध केले. या कार्यक्रमात विघ्नहर सहकारी साखर कारखान्याचे उपाध्यक्ष अशोक घोलप, बाजार समिती संचालक संतोष चव्हाण, पंचायत समिती उपसभापती अमित ढोले, नगरसेवक अनिल रोकडे, माजी नगरसेवक मधुकर काजळे, कात्रज दूध संघाचे माजी उपाध्यक्ष भाऊसाहेब देवाडे, विघ्नहरचे संचालक देवेंद्र खिलारी, सीताराम खिलारी, डॉ. विलास चव्हाण, यशवंत चव्हाण, प्रा. शरद मनसुख आदी मान्यवरांनी कै. हौसाबाई यांना शब्दरूपी श्रद्धांजली वाहिली.

यावेळी पोलीस पाटील पांडुरंग गाडे, दाऱ्याघाट संघर्ष समितीचे अध्यक्ष चंद्रकांत काजळे, सतीश सांगडे, अभिजीत गांजाळे, ज्ञानेश्वर काजळे, प्रकाश कामटकर, कृषी उत्पन्न बाजार समितीच्या माजी संचालिका सुरेखा गांजाळे यांच्यासह पंचक्रोशीतील नागरिक मोठ्या संख्येने (Ozar News) उपस्थित होते.