Junnar Crime – जुन्नर आणि आंबेगाव तालुक्यातील विविध मंदिरांमधील दानपेट्या फोडून चोरी करणाऱ्या टोळीला स्थानिक गुन्हे शाखा पुणे ग्रामीण पोलिसांनी अटक केली आहे. या कारवाईमुळे मंदिर चोरीचे एकूण आठ गुन्हे उघडकीस आले असून, आरोपींकडून रोख रक्कम, चांदीच्या पादुका, गुन्ह्यात वापरलेली मोटारसायकल आणि इतर साहित्य असा एकूण १ लाख १९ हजार रुपयांचा मुद्देमाल जप्त करण्यात आला आहे. आळे येथील श्रीखंडोबा मंदिरातील चोरीप्रकरणी शांताराम भुजबळ यांनी दिलेल्या फिर्यादीवरून या तपासाला गती मिळाली होती. गेल्या दोन महिन्यांत आळे, शिरोली बुद्रुक, नारायणगाव, नळवणे, मंचर, घालेवाडी आणि रांजणगाव परिसरातील मंदिरांमध्ये दानपेट्या फोडण्याचे सत्र वाढले होते. यात्रा उत्सवांच्या काळात घडणाऱ्या या घटनांमुळे भाविकांमध्ये संताप होता. या पार्श्वभूमीवर पोलीस अधीक्षक संदीप सिंह गिल्ल यांच्या आदेशानुसार स्थानिक गुन्हे शाखेचे पोलीस निरीक्षक अविनाश शिळीमकर यांनी विशेष पथक तयार केले. सीसीटीव्ही फुटेज आणि तांत्रिक विश्लेषणाच्या आधारे तपास करत असताना कांदळी फाटा परिसरातून सुनील सुरेश आगिवले (वय २०, रा. कळस खुर्द, जि. अहिल्यानगर) आणि भिमा भाऊसाहेब गिन्हे (वय २६, रा. नांदूर शिंगोटे, जि. अहिल्यानगर) या दोघांना ताब्यात घेण्यात आले. चौकशीदरम्यान आरोपींनी जुन्नर, आंबेगाव तसेच संगमनेर भागातील मंदिरांमध्ये चोऱ्या केल्याची कबुली दिली. आरोपींकडून कटावणी, स्क्रू ड्रायव्हर आणि स्प्रे यांसारखे साहित्यही जप्त करण्यात आले आहे. या कारवाईत आळेफाटा, नारायणगाव, रांजणगाव, जुन्नर, मंचर आणि संगमनेर पोलीस ठाण्यांच्या हद्दीतील गुन्हे उघड झाले आहेत. ही कामगिरी अप्पर पोलीस अधीक्षक रमेश चोपडे, उपविभागीय पोलीस अधिकारी धनंजय पाटील यांच्या मार्गदर्शनाखाली सहाय्यक पोलीस निरीक्षक शेलार, पोलीस अंमलदार दीपक साबळे, संदीप वारे आणि पथकाने फत्ते केली.
