Junnar Assembly Election 2024 : महाराष्ट्र राज्यातील 288 विधानसभा मतदारसंघासाठी बुधवारी (20 नोव्हेंबर) मतदान झाले. या निवडणुकीचा निकाल आज(23 नोव्हेंबर) जाहीर होत असून मतमोजणीस सुरूवात झाली आहे. एकेका मतदारसंघाचा निकाल समोर येण्यासही सुरूवात झाली आहे. या निवडणुकीत अनेक बिग फाईट्स पहायला मिळाल्या तर काही ठिकाणी धक्कादायक निकाल समोर आले आहेत. जुन्नर मतदारसंघातही असाच निकाल समोर आला आहे.

महाराष्ट्रातील एक महत्त्वाचा मतदार संघ म्हणून जुन्नरकडेही पाहिले जाते. जुन्नर शिरूर लोकसभा मतदार संघात मोडणारा मतदार संघ आहे. या मतदारसंघात अन्य अनेक मतदारसंघांप्रमाणेच महायुती आणि महाआघाडी यांच्यात थेट लढत होती. अजित पवार यांच्या राष्ट्रवादी काँग्रेस पक्षाचे उमेदवार अतुल वल्लभ बेनके आणि श्री विघ्नहर सहकारी साखर कारखान्याचे अध्यक्ष सत्यशील शेरकर हे शरद पवार यांच्या राष्ट्रवादी काँग्रेसकडून निवडणूकीच्या रिंगणात होते. त्यांना माजी आमदार शरद सोनवणे, आशा बुचके या दोन अपक्ष उमेदवारांसह वंचित बहुजन आघाडीचे देवराम लांडे यांचेही आव्हान होते.

मात्र, याठिकाणी सत्यशील शेरकर किंवा अनुल बेनके नव्हे तर अपक्ष उमेदवार आणि माजी आमदार शरद सोनवणे यांनी बाजी मारली आहे. अपक्ष उमदेवार शरद सोनावणे यांनी 73 हजार 355 मते मिळवताना विजय साकारला आहे. त्यांनी राष्ट्रवादी काँग्रेसचे (शरद पवार गट) सत्यशील शेरकर यांचा 6 हजार 664 मतांनी पराभव केला आहे.  सत्यशील शेरकर यांनी 66 हजार 691 तर अनुल बेनके यांना 48 हजार 100 मते मिळाली आहेत. आशा बुचके यांना 9 हजार 435 तर  वंचित बहुजन आघाडीचे देवराम लांडे यांना 22 हजार 401 मते मिळाली आहेत.

कोण आहेत शरद सोनवणे?

विद्यमान निवडणुकीत अपक्ष उमेदवार म्हणून लढणारे शरद  सोनवणे यांचा 2019 च्या विधानसभा निवडणुकीत पराभव झाला होता. त्यावेळी त्यांनी शिवसेनेचे उमेदवार म्हणून निवडणूक लढवली होती आणि राष्ट्रवादीचे उमेदवार अतुल वल्लभ बेनके यांनी त्यांचा पराभव केला होता. तर 2014 च्या विधानसभा निवडणुकीत शरद सोनवणे विजयी झाले होते. त्यावेळी महाराष्ट्र नवनिर्माण सेनेच्या तिकिटावर विजयी झाले होते. 2014 च्या महाराष्ट्र विधानसभा निवडणुकीत मनसेच्या तिकिटावर विजयी झालेले ते एकमेव उमेदवार होते.