IND vs ENG 5th T20I Jos Buttler Century Harry Brook Record Partnership : इंग्लंड दौऱ्यावर भारतीय क्रिकेट संघाची सुरू झालेली दुरवस्था मालिकेच्या शेवटच्या सामन्यातही कायम राहिली. टी-२० मालिका आधीच गमावलेल्या टीम इंडियाला पाचव्या आणि अंतिम सामन्यातही इंग्लंडच्या फलंदाजांनी बेदम चोपले. साऊथम्पॅटनच्या युटिलिटा बोल स्टेडियमवरील सामन्यात इंग्लंडने प्रथम फलंदाजी करताना ब्रूक-बटलरच्या २३३ धावांच्या भागीदारीच्या जोरावर ३ गडी गमावून धावांचा डोंगर उभारत भारतासमोर २५८ धावांचे लक्ष्य ठेवले आहे. यासह बटलर-ब्रूकने अनेक विक्रम मोडले.

इंग्लंडचा दिग्गज सलामीवीर जॉस बटलरने (Jos Buttler) भारतीय गोलंदाजीची पिसे काढत एक स्फोटक शतक ठोकले. बटलरने जवळपास ५ वर्षांच्या प्रदीर्घ प्रतीक्षेनंतर टी-२० आंतरराष्ट्रीय क्रिकेटमध्ये शतक झळकावले आणि कर्णधार हॅरी ब्रुकसोबत मिळून जागतिक विक्रमाची नोंद केली. यादरम्याने हॅरी ब्रूकचे शतक अवघ्या पाच धावांनी हुकले.

१६० व्या सामन्याचे शतकी सेलिब्रेशन!

ENGLAND POST A MASSIVE 257/3 AGAINST INDIA! 🤯

– Jos Buttler – 131 (64)
– Harry Brook – 95 (45)*
– Will Jacks – 7 (2)*#ENGvIND pic.twitter.com/s55pnpmNPV

— Rana Ahmad. (@AhmadRana056) July 11, 2026

या सामन्यापूर्वी बटलरचा फॉर्म खराब होता आणि तो ३ डावांत केवळ ४४ धावा करू शकला होता. योगायोगाने हा बटलरचा १६० वा टी-२० आंतरराष्ट्रीय सामना होता, ज्यासह तो सर्वाधिक टी-२० सामने खेळणाऱ्या खेळाडूंच्या यादीत जगात दुसऱ्या स्थानावर पोहोचला. या ऐतिहासिक टप्प्याचा आनंद त्याने शतकासह साजरा केला. फिल सॉल्ट लवकर बाद झाल्यानंतरही बटलरने भारतीय गोलंदाजांवर हल्ला चढवला. त्याने पहिले अर्धशतक ३४ चेंडूंत पूर्ण केले, तर पुढच्या ५० धावा अवघ्या १७ चेंडूंत कुटून काढल्या.

५१ चेंडूंत शतक; अक्षर पटेलला लगावला षटकार –

51 BALL HUNDRED BY JOS BUTTLER.

– Jos The Boss is back to his very best, a fantastic century against India. pic.twitter.com/XsIaHgCawE

— Mufaddal Vohra (@mufaddal_vohra) July 11, 2026

बटलरने १६ व्या षटकात अक्षर पटेलच्या चेंडूवर उत्तुंग षटकार खेचत अवघ्या ५१ चेंडूंत आपले शतक पूर्ण केले. अखेर १९ व्या षटकात बाद होण्यापूर्वी त्याने ६४ चेंडूंत तब्बल १३१ धावांची विनाशकारी खेळी केली, ज्यामध्ये १२ चौकार आणि ८ गगनभेदी षटकारांचा समावेश होता. बटलरचे हे टी-२० आंतरराष्ट्रीय कारकिर्दीतील दुसरे शतक आहे. यापूर्वी त्याने नोव्हेंबर २०२१ मध्ये श्रीलंकेविरुद्ध पहिले शतक झळकावले होते.

हेही वाचा – Surya Viral Photo : सूर्याच्या ‘त्या’ एका फोटोने सोशल मीडियावर खळबळ! ‘कॅप्टन’ शब्दावर फुली अन् निवडकर्त्यांवर थेट निशाणा?

संजू -तिलकचा वर्ल्ड रेकॉर्ड मोडला –

या सामन्यात बटलरने कर्णधार हॅरी ब्रुकच्या साथीने दुसऱ्या विकेटसाठी २३३ धावांची अखंड भागीदारी रचली. टी-२० आंतरराष्ट्रीय क्रिकेटच्या इतिहासात (पूर्ण सदस्य देशांमध्ये) कोणत्याही विकेटसाठी झालेली ही सर्वात मोठी भागीदारी ठरली आहे. विशेष म्हणजे, त्यांनी भारताचाच संजू सॅमसन आणि तिलक वर्मा यांचा २१० धावांचा जागतिक विक्रम मोडीत काढला. या ऐतिहासिक खेळीच्या जोरावर इंग्लंडने भारतासमोर २५७ धावांचा एव्हरेस्टसारखा डोंगर उभा केला.