लोणावळा – दिवाळीच्या सणात शहरात मोठी चोरीची घटना घडली आहे. लक्ष्मीपूजनासाठी देव्हाऱ्यासमोर ठेवलेले सोन्याचे दागिने आणि २५,५०० रुपयांची रोकड असा एकूण १४ लाख ५ हजार रुपयांचा ऐवज चोरट्याने लंपास केला. याप्रकरणी लोणावळा शहर पोलीस ठाण्यात गुन्हा दाखल करण्यात आला असून, पोलिसांनी तपास सुरू केला आहे.

याबाबत निलम कदम (रा. देवकीनंदन अपार्टमेंट, गवळीवाडा, लोणावळा) यांनी फिर्याद दिली आहे. दिवाळीनिमित्त लक्ष्मीपूजन करण्यासाठी त्यांनी घरातील सोन्याचे दागिने आणि २५,५०० रुपयांची रोकड किचनमधील देव्हाऱ्यासमोर ठेवली होती. दरम्यान, सोमवारी (दि. ९) सकाळी गावातील मंदिरात काकड आरती असल्याने त्या घराबाहेर पडल्या. त्यावेळी पती आणि मुलगा घरात झोपलेले होते. त्यांनी घराला बाहेरून कडी लावली होती.

काही वेळाने त्या घरी परतल्या असता देव्हाऱ्यासमोरील दागिने आणि रोकड गायब असल्याचे त्यांच्या निदर्शनास आले. चोरट्याने घराची बाहेरील कडी उघडून आत प्रवेश केला आणि मणीमंगळसूत्र, राणीहार, चोपर, विविध प्रकारचे सोन्याचे टोप, झुमके, सोन्याच्या चेन, अंगठ्या आणि रोकड असा एकूण १४ लाख ५ हजार रुपयांचा ऐवज चोरून नेला.

घटनेची माहिती मिळताच लोणावळा शहर पोलिसांनी घटनास्थळी धाव घेतली. पोलीस निरीक्षक महेश विधाते यांच्या मार्गदर्शनाखाली श्वान पथक आणि फिंगरप्रिंट तज्ज्ञांना पाचारण करण्यात आले. तांत्रिक आणि वैज्ञानिक पद्धतीने तपास सुरू करण्यात आला आहे. तसेच परिसरातील सीसीटीव्ही फुटेज तपासण्याचे कामही सुरू आहे.

कटाक्ष : नोटबंदीची दहा वर्षे!