सांगली : सांगली जिल्ह्यात काँग्रेसला धक्का देत जयश्री पाटील यांनी काल (18 जून) मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला. यानंतर राष्ट्रवादी काँग्रेस (शरदचंद्र पवार) पक्षाचे प्रदेशाध्यक्ष जयंत पाटील यांनी भाजपवर जोरदार टीका केली आहे. “भ्रष्टाचाराचे आरोप करून नेत्यांना जेरीस आणायचं आणि मग पक्षात घेऊन ‘पवित्र’ करायचं, ही भाजपची नवी पद्धत आहे,” असा टोला त्यांनी लगावला. जयश्री पाटलांचा प्रवेश आणि वाद जयश्री पाटील, माजी मुख्यमंत्री वसंतदादा पाटील यांच्या नातसून आणि सांगली जिल्हा बँकेच्या उपाध्यक्षा, यांनी राष्ट्रवादीत जाण्याच्या चर्चांनंतर अचानक भाजपचा हात धरला. चंद्रकांत पाटील आणि चंद्रशेखर बावनकुळे यांनी सूत्रे हलवत हा प्रवेश घडवून आणला. मात्र, सुधाकर बडगुजर यांच्या प्रवेशाप्रमाणे याही प्रवेशामुळे सांगलीतील काही भाजप नेते नाराज आहेत, ज्यामुळे पक्षांतर्गत वादाची शक्यता आहे. जयंत पाटलांचा भाजपवर निशाणा जयंत पाटील यांनी भाजपवर खरमरीत टीका करताना म्हटलं, “ज्यांच्यावर गैरव्यवहाराचे आरोप आहेत, त्यांना भाजप पायघड्या घालतो. अशा नेत्यांचा पक्षात सत्कार होतो, ज्यांच्याविरुद्ध याच भाजप नेत्यांनी आधी भाषणं केली होती. लोकांना हे समजायला हवं.” त्यांनी जनतेच्या विस्मरणावरही खेद व्यक्त केला, “लोकांना अशा नेत्यांचे मागील कृत्य विसरतात आणि ते उजळ माथ्याने नवीन वाटचाल करतात.” “माझ्यासारख्या गरीबाचं भाजपमध्ये काय काम?” भाजप प्रवेशाच्या सततच्या चर्चांवर जयंत पाटील यांनी मिश्कीलपणे पत्रकारांना सुनावलं, “भाजप हा जगातला मोठा पक्ष आहे. तिथे मोठमोठी माणसं जातात, माझ्यासारख्या गरीबाचं तिथे काय काम? मला वेठीस का धरता? मुख्यमंत्र्यांशी भेट ही विरोधी पक्षनेता म्हणूनच आहे.” त्यांनी यशवंतराव आणि वसंतदादांच्या विचारांचा दाखला देत जयश्री पाटलांच्या प्रवेशावर भाष्य टाळलं, “आता परिस्थिती बदलली, काही वेगळे निर्णय झाले. यावर मी बोलणार नाही.” सांगलीच्या राजकारणात खळबळ जयश्री पाटलांच्या प्रवेशाने सांगलीत काँग्रेसला मोठा धक्का बसला आहे. अपक्ष खासदार विशाल पाटील यांनीही यावर तीव्र नाराजी व्यक्त केली आहे. आगामी स्थानिक स्वराज्य संस्थांच्या निवडणुकीत भाजपला यामुळे बळ मिळण्याची शक्यता आहे, पण पक्षांतर्गत नाराजी आणि जयंत पाटलांच्या टीकेमुळे सांगलीचं राजकीय वातावरण तापलं आहे.
