Jarandeshwar Temple – कोरेगाव विधानसभा मतदारसंघात कोरेगाव आणि सातारा तालुक्यांच्या सीमेवर असलेल्या प्रसिद्ध जरंडेश्वर मारुती देवस्थान परिसराच्या विकासासाठी राज्य शासनाने दोन कोटी 99 लाख 95 हजार रुपयांचा निधी मंजूर केला आहे. ग्रामविकास मंत्री जयकुमार गोरे यांनी मान्यता दिल्याने देवस्थान परिसरात भाविकांसाठी सोयीसुविधा करण्याचा मार्ग मोकळा झाला आहे. जरंडेश्वर मारुती देवस्थानाला राज्य शासनाचा ‘ब’ वर्ग तीर्थक्षेत्राचा दर्जा आहे.

धार्मिक आणि ऐतिहासिक महत्त्व असलेल्या या देवस्थानात दरवर्षी लाखो भाविक दर्शनासाठी येतात. या देवस्थानच्या विकासासाठी सार्वजनिक बांधकाम मंत्री शिवेंद्रसिंहराजे भोसले आणि कोरेगावचे आमदार महेश शिंदे यांनी ग्रामविकास मंत्री गोरे यांच्याकडे निधीची मागणी केली होती. मंत्री गोरे यांनी या मागणीला तत्त्वतः मान्यता देत, जिल्हा परिषदेला सविस्तर प्रस्ताव सादर करण्याचे निर्देश दिले होते. त्यानुसार जिल्हा परिषदेने प्रस्ताव पाठविल्यानंतर निधी मंजूर करण्यात आला.

या निधीतून पुरुष व महिला भाविकांसाठी स्वतंत्र स्वच्छतागृहे, मूलभूत सुविधा आणि इतर कामे करण्यात येणार आहेत. सातारा तालुक्यातील बोरखळ येथून देवस्थानापर्यंत नवीन रस्ता व वाहनतळ करण्यासाठी एक कोटी रुपयांचा निधी मंजूर करण्यात आला आहे. याशिवाय बोरखळ बाजूने डोंगरालगत संरक्षक भिंत उभारण्यासाठी 50 लाख रुपयांची तरतूद करण्यात आली आहे.

सध्या सातारा रोड आणि जांब बुद्रुक येथून जरंडेश्वर डोंगरावर जाण्याची सुविधा आहे. नव्या कामांमुळे बोरखळ रस्ताही होणार असल्याने, देवस्थानाकडे तिन्ही बाजूंनी जाता होणार आहे. दरवर्षी श्रावण महिन्यातील प्रत्येक शनिवारी जरंडेश्वर मारुतीच्या दर्शनासाठी राज्याच्या विविध भागांमधून भाविक येतात. निधी मंजूर झाल्याने, देवस्थान परिसराचा विकास होऊन, भाविकांना अधिक चांगल्या सुविधा मिळणार आहेत.