Mamata Banerjee | Pahalgam Attack | Operation Sindoor – मंगळवारी पश्चिम बंगाल विधानसभेत सशस्त्र दलांचे कौतुक करणारा प्रस्ताव मांडण्यात आला. यावेळी मुख्यमंत्री ममता यांनी केंद्र सरकारवर निशाणा साधला.

ममता म्हणाल्या, पहलगाम दहशतवादी हल्ला हा केंद्राच्या निष्काळजीपणाचा परिणाम होता. दहशतवादी हल्ल्याच्या ठिकाणी सुरक्षा कर्मचारी का नव्हते? असा प्रश्‍नही त्यांनी मोदी सरकारला विचारला.

त्या पुढे म्हणाल्या की, भाजप सशस्त्र दलांच्या शौर्याचे राजकारण करण्याचा प्रयत्न करत आहे, देशातील जनतेला सुरक्षा देण्यात अपयशी ठरल्यामुळे भाजप सरकारने सत्ता सोडली पाहिजे. त्यात पंतप्रधान मोदी फक्त स्वतःची जाहिरात करण्यात व्यस्त आहेत, असेही त्यांनी म्हटले.

पहलगाम हल्ल्यानंतर पाकिस्तानवर केलेला हवाई हल्ला आणि ऑपरेशन सिंदूर ही पीओके (पाकव्याप्त काश्मीर) परत घेण्याची एक चांगली संधी होती, असेही ममता यांनी विधानसभेत सांगितले. जेव्हा जेव्हा निवडणुका जवळ येतात तेव्हा भाजप पुलवामासारख्या घटना घडवून आणते असा आरोप ममतांनी केला.

या सर्व गोष्टी असूनही, राष्ट्राचे रक्षण करण्यासाठी सशस्त्र दलांच्या धाडसाचे कौतुक करणारा ठराव मांडण्यात आला, जो कोणत्याही विरोधाशिवाय मंजूर करण्यात आला.

प्रस्तावात ‘सिंदूर’ हा शब्द का नाही? – भाजप

विरोधी पक्षनेते शुभेंदु अधिकारी यांच्या नेतृत्वाखाली भाजप आमदार सभागृहात उभे राहिले. सर्वांनी घोषणाबाजी सुरू केली आणि बॅनर्जी यांच्यावर राष्ट्रीय शोकांतिकेचे राजकारण करण्याचा आरोप केला.

त्यानंतर तृणमूल काँग्रेस आणि भाजप सदस्यांमध्ये जोरदार वाद झाला, ज्यामुळे सभापती बिमन बॅनर्जी यांना हस्तक्षेप करावा लागला. वाद असूनही, सभागृहात सुव्यवस्था पुनर्संचयित झाल्यानंतर हा ठराव एकमताने मंजूर करण्यात आला.

विरोधी पक्षनेते सुवेंदू अधिकारी म्हणाले की, पहलगाम हल्ल्यात एका धार्मिक समुदायाला विशेषतः लक्ष्य करण्यात आले होते, ज्याचा ठरावात उल्लेख नाही. ठरावात सिंदूर हा शब्द का नाही असा प्रश्न भाजपने उपस्थित केला.