जामखेड : अहिल्यानगर जिल्ह्यातील जामखेड नगरपरिषदेच्या निवडणुकीत भारतीय जनता पक्षाने (भाजप) ऐतिहासिक यश मिळवले आहे. विधानपरिषदेचे सभापती प्रा. राम शिंदे यांच्या मार्गदर्शनाखाली भाजपने नगराध्यक्षपदासह एकूण १५ जागांवर विजय मिळवला. नवनिर्वाचित नगराध्यक्षा प्रांजल अमित चिंतामणी यांनी प्रतिस्पर्ध्याला तब्बल ३६८२ मतांच्या मोठ्या फरकाने पराभूत करून आपली ताकद दाखवली. ही निवडणूक केवळ स्थानिक स्वराज्य संस्थेपुरती मर्यादित राहिली नाही, तर ती प्रा. राम शिंदे विरुद्ध राष्ट्रवादी काँग्रेस (शरद पवार गट) चे आमदार रोहित पवार अशी प्रतिष्ठेची लढत बनली होती. दोन्ही नेत्यांनी पूर्ण ताकद पणाला लावली असतानाही, भाजपने स्पष्ट बहुमत मिळवले. प्रा. राम शिंदे यांच्या निर्विवाद नेतृत्वाला, संघटनात्मक बळाला, कार्यकर्त्यांच्या मजबूत जाळ्याला आणि त्यांच्या वैयक्तिक जनसंपर्काला या विजयाचे श्रेय दिले जात आहे. विरोधकांच्या राजकीय ताकदीवर यामुळे मोठे प्रश्नचिन्ह उभे राहिले आहे. नवनिर्वाचित नगराध्यक्षा प्रांजल चिंतामणी यांचा अधिकृत पदग्रहण समारंभ उद्या, गुरुवार दिनांक १ जानेवारी २०२६ रोजी सकाळी १० वाजता नगरपरिषद कार्यालयात आयोजित करण्यात आला आहे. हा सोहळा विधानपरिषद सभापती प्रा. राम शिंदे यांच्या प्रमुख उपस्थितीत पार पडणार आहे. विशेष बाब म्हणजे, उद्या प्रा. राम शिंदे यांचा वाढदिवस असल्याने हा पदग्रहण सोहळा त्यांना खास भेटवस्तूच ठरला आहे. भाजपचे सर्व नवनिर्वाचित नगरसेवक, पदाधिकारी आणि कार्यकर्ते यांच्या उपस्थितीत हा कार्यक्रम संपन्न होईल. जामखेड नगरपरिषदेच्या या घवघवीत यशामुळे भाजपची स्थानिक पातळीवरील पकड अधिक मजबूत झाली आहे. नवनिर्वाचित नगराध्यक्षा प्रांजल चिंतामणी यांनी विजयानंतर जनतेने दाखवलेल्या विश्वासाला तडा जाऊ देणार नाही आणि शहराच्या विकासाला प्राधान्य देऊ, अशी ग्वाही दिली आहे. हा विजय महायुतीच्या यशाचा भाग मानला जात असून, राज्यातील स्थानिक स्वराज्य संस्थांच्या निवडणुकांमध्ये भाजपच्या वर्चस्वाला आणखी बळ मिळाले आहे.या सोहळ्याकडे जामखेडसह संपूर्ण जिल्ह्यातील राजकीय वर्तुळाचे लक्ष लागले आहे. प्रा. राम शिंदे यांच्या नेतृत्वाखालील भाजपची ही कामगिरी भविष्यातील निवडणुकांसाठी प्रेरणादायी ठरेल, अशी चर्चा आहे.
