Jamie Overton take indefinite break from Test cricket : इंग्लंडचा अष्टपैलू खेळाडू जेमी ओव्हरटनने मोठा निर्णय जाहीर करत सर्वांना आश्चर्यचकित केले आहे. जेमी ओव्हरटनने कसोटी क्रिकेटमधून अनिश्चित काळासाठी विश्रांती घेण्याचा निर्णय घेतला आहे. हा निर्णय त्याने अशा वेळी घेतला आहे, जेव्हा इंग्लंड संघ 2025 मधील अ‍ॅशेस मालिकेच्या तयारीत व्यस्त आहे. इंग्लंड संघ नोव्हेंबर 2025 मध्ये अ‍ॅशेससाठी ऑस्ट्रेलियाचा दौरा करणार आहे. अशा परिस्थितीत ओव्हरटनच्या या निर्णयामुळे इंग्लंडच्या तयारीला मोठा धक्का बसला आहे.

जेमीने खेळलेत दोन कसोटी सामने –

जेमी ओव्हरटनने सरे आणि समरसेटकडून 99 प्रथम श्रेणी सामने खेळले आहेत. त्याने इंग्लंडसाठी दोन कसोटी सामने खेळले आहेत. ओव्हरटनने सांगितले की, बराच विचार केल्यानंतर त्याने कसोटी क्रिकेटमधून अनिश्चित काळासाठी विश्रांती घेण्याचा निर्णय घेतला आहे. इंग्लंडसाठी दोन कसोटी सामने आणि 99 प्रथम श्रेणी सामने खेळण्याचे भाग्य त्याला लाभले, याबद्दल तो स्वतःला भाग्यवान समजतो.

जेमी ओव्हरटनने काय सांगितले?

ओव्हरटनने सांगितले की, प्रथम श्रेणी क्रिकेटने त्याच्या व्यावसायिक कारकीर्दीचा पाया रचला आणि आतापर्यंत मिळालेल्या प्रत्येक संधीचा तो आभारी आहे. याच क्रिकेटमुळे त्याला खेळ शिकायला मिळाला आणि याचमुळे त्याच्या ध्येयांना आणि महत्त्वाकांक्षांना बळ मिळाले, ज्याने त्याला दीर्घकाळ प्रेरित केले. मात्र, कारकीर्दीच्या या टप्प्यावर, वर्षभराच्या क्रिकेटच्या मागण्या पाहता, शारीरिक आणि मानसिकदृष्ट्या सर्वच स्वरूपांसाठी पूर्णपणे समर्पित राहणे शक्य नाही.

हेही वाचा – “त्याला दुधातून माशी बाहेर फेकल्यासारखं फेकून दिलं गेलं…’, आकाश चोप्राने कोणाबद्दल केलं हे संतप्त वक्तव्य?

जेमी फक्त वनडे आणि टी-20 सामने खेळणार –

ओव्हरटनने पुढे सांगितले की, यापुढे त्याचे पूर्ण लक्ष मर्यादित षटकांच्या क्रिकेटवर असेल आणि जोपर्यंत शक्य आहे तोपर्यंत उच्च स्तरावर खेळण्यासाठी तो आपले सर्वोत्तम प्रयत्न सुरू ठेवेल. इंग्लंड पुरुष क्रिकेटचे संचालक रॉब की यांनी सांगितले की, ‘जेमीचा हा निर्णय अनपेक्षित होता आणि यामुळे दुख: झाले, कारण तो जवळच्या भविष्यात आमच्या कसोटी क्रिकेट योजनांचा भाग होता. आम्ही त्याच्या निर्णयाचा आदर करतो आणि आम्हाला याची माहिती दिल्याबद्दल त्याचे आभार मानतो.’