Vijay Chavan : अंबडचे तहसीलदार विजय चव्हाण यांना 6 लाख 40 हजार रुपयांची लाच स्वीकारताना रंगेहात पकडण्यात आल्यानंतर या प्रकरणाला आता नवे वळण मिळाले आहे. या लाच प्रकरणातील तक्रारदार सुयोग सोळुंके याला गोंदी पोलिसांनी अटक केली असून न्यायालयाने त्याला दोन दिवसांची पोलीस कोठडी सुनावली आहे. (Vijay Chavan)

माहितीनुसार, सुयोग सोळुंके याच्याविरोधात 2025 मध्ये अवैध वाळू उत्खनन, वाळू चोरी आणि इतर गंभीर स्वरूपाचे गुन्हे दाखल होते. याशिवाय त्याच्यावर तडीपारीची कारवाईही करण्यात आली होती. दोन महिन्यांपूर्वीच त्याची जामिनावर सुटका झाली होती. त्यामुळे जुन्या गुन्ह्यांमध्ये आतापर्यंत अटक का झाली नाही, असा प्रश्न उपस्थित केला जात आहे. (Vijay Chavan)

अवैध वाळू उत्खननासाठी वापरण्यात येणारे पोकलेन मशीन आणि सहा हायवा वाहने सुरू ठेवण्यासाठी तहसीलदार विजय चव्हाण यांनी 6 लाख 40 हजार रुपयांची लाच मागितल्याची तक्रार सोळुंके यांनी केली होती. त्यानंतर बीड लाचलुचपत प्रतिबंधक विभागाने सापळा रचून चव्हाण यांना रंगेहात अटक केली होती. (Vijay Chavan)

दरम्यान, सुयोग सोळुंके याच्यावर यापूर्वीही अवैध वाळू उत्खननाशी संबंधित अनेक गुन्हे दाखल असल्याची माहिती समोर आली आहे. गोंदी पोलीस ठाण्यात त्याच्याविरुद्ध भारतीय न्याय संहितेच्या विविध कलमांसह गौण खनिज (विकास व विनियमन) अधिनियमांतर्गत गुन्हे नोंद आहेत. याच प्रकरणात त्याला अटक करण्यात आली आहे. (Vijay Chavan)

विशेष म्हणजे, शनिवारी एसीबीने एकाच दिवशी दोन मोठ्या कारवाया केल्या होत्या. एका कारवाईत पोलीस अंमलदाराला 10 हजार रुपयांची लाच स्वीकारताना अटक करण्यात आली, तर दुसऱ्या कारवाईत अंबडचे तहसीलदार विजय चव्हाण यांना 6 लाख 40 हजार रुपयांची लाच घेताना पकडण्यात आले. या दुहेरी कारवाईमुळे प्रशासनात मोठी खळबळ उडाली असून आता तक्रारदाराच्या अटकेमुळे प्रकरण आणखी चर्चेत आले आहे. (Vijay Chavan)