राहुल गांधी यांनी म्हटले आहे की, ज्यांनी स्वातंत्र्यलढ्यात कधी भाग घेतला नाही, त्या लोकांकडून हुताम्यांचा हा अक्षम्य अवमान झाला आहे. ज्यांना हौतात्म्य या शब्दाचा अर्थच माहिती नाही, हौतात्म्य म्हणजे काय याची कल्पना नाही, अशा लोकांकडून त्यांचा हा अवमान झाला आहे. हुताम्यांच्या पुत्रांना हा अवमान कदापिही सहन होणार नाही. मी स्वतः हुतात्म्याचा पुत्र आहे मीही हे सहन करणार नाही, असेही राहुल गांधी यांनी आपल्या ट्विटरवर म्हटले आहे. आम्ही या हुतात्म्यांच्या क्रूर थट्टेचा निषेध करतो, असेही त्यांनी म्हटले आहे.

जालियनवाला बाग स्मारकाच्या ठिकाणी करण्यात आलेल्या लाईटिंग शो आणि लेसर शोचा व्हिडिओही राहुल गांधी यांनी आपल्या ट्विटर सोबत शेअर केला आहे. या प्रकाराबाबत अनेक राजकीय नेत्यांकडून टीका सुरू आहे. इतिहासाचा वारसा नष्ट करण्याच्या प्रयत्नांचाच हा एक भाग आहे अशी टीकाही आता सुरू झाली आहे.

मार्क्‍सवादी कम्युनिस्ट पक्षाचे सरचिटणीस सीताराम येच्युरी यांनीही या प्रकरणावरून सरकारवर टीका केली असून भाजपचे लोक स्वातंत्र्यलढ्यापासून दूर राहिले होते. त्याचा संदर्भ त्यांनीही दिला आहे. जालियनवाला बागेत ब्रिटिशांनी सुमारे शंभर वर्षांपूर्वी जो गोळीबार केला त्यात एक हजार लोकांनी हौतात्म्य पत्करले असून त्यांच्या स्मारकाच्या ठिकाणी डिस्को लाईटिंगचा जल्लोष मलाही अवमानकारक वाटतो तो अक्षम्य आहे, असे कॉंग्रेस नेते गौरव गोगोई यांनी म्हटले आहे.