जयपूर – जेवणात चव वाढवणारा बटाटा जेव्हा पोलिसांची भूमिका बजावू लागतो, तेव्हा विचार करायलाही फार विचित्र वाटेल. पण हे घडले आहे. घटना घडण्यापूर्वीच पोलिस अनेकवेळा प्रकरण उघड करून सर्वांनाच चकित करतात, त्याचप्रमाणे बटाट्याने भरलेल्या ट्रॅक्टरने कोट्यवधी रुपयांच्या दरोड्याची घटना टाळली आहे. घटना अशी तशी नसून दोन बँका आणि दागिन्यांच्या शोरूममध्ये दरोडा पडणार होता. त्याआधीच बटाट्यामुळे हे प्रकरण उघडकीस आले आहे.

याबाबत सविस्तर माहिती अशी की, जयपूरच्या अंबाडी भाजी मंडईत दररोज भाजीपाल्यांनी भरलेले ट्रॅक्टर येत-जात असतात. मंगळवारीही पहाटे चार वाजण्याच्या सुमारास एका व्यावसायिकाचा बटाट्याच्या मोठमोठ्या पोत्यांनी भरलेला ट्रॅक्टर बाजारात येत होता, मात्र ट्रॅक्टर मार्केटमध्ये येताच ट्रॅक्टरचे मागचे चाक जमिनीत रुतले. बाजारात उपस्थित लोकांनी कसा तरी ट्रॅक्टर पुढे-मागे हलवून बाहेर काढला.

पोलिस चक्रावले –

बर्‍याच प्रयत्नांनंतर ट्रॅक्टर बाहेर काढला तेव्हा, ट्रॅक्टरचे चाक जिथे अडकले होते, तिथे नाली किंवा रस्ता तुटलेला नव्हता, तर एक लांब बोगदा असल्याचे दिसले. बाजारातील व्यापाऱ्यांनी क्षणाचाही विलंब न करता पोलिसांना कळवले. विद्याधरनगर पोलीस ठाण्याचे पोलीस घटनास्थळी पोहोचले. त्यांनी तो बोगदा पाहिला आणि चक्रावले. पोलीसांनी तपास केला असता तो बोगद्याचा मार्ग अंबाडी भाजी मंडईजवळील सोहनलाल वॉशरमनच्या दुकानापर्यंत पोहोचला. त्यानंतर पोलिसांनी दुकानाचे कुलूप उघडले तेव्हा दुकानमालकासह सर्वच चक्रावले.

दुकान भाड्याने दिले होते –

ते दुकान उत्तर प्रदेशातील रहिवासी अन्वर आणि सलमानसह चार जणांना प्रति महिना 11 हजार रुपये भाड्याने दिले होते. ते त्या दुकानात खताचा व्यवसाय करतात असे सांगण्यात आले होते. पोलिसांनी दुकान मालकाला फोन करून तरुणांना दुकानात बोलावले, मात्र एकच तरुण घटनास्थळी पोहोचला. त्यानंतर पोलिसांना पाहून तो तरुण पळू लागला मात्र पोलिसांनी त्याचा पाठलाग करून त्याला पकडले.

50 फूट खोदकाम बाकी होते –

दुकानाची झडती घेतली असता बनावट कागदपत्रे, भाडेपत्र आणि बोगद्याचा नकाशाही सापडला. पोलिसांनी ताब्यात घेतलेल्या तरुणांच्या आधारे तपास सुरू केला असता, दुकानाखाली 10 फूट खोदलेला 100 मीटरचा बोगदा एसबीआय बँक, सेंट्रल बँक आणि ज्वेलरी शोरूमच्या दिशेने जात असल्याचे आढळून आले. ज्वेलरी शोरूम आणि दोन्ही बॅंकापर्यंत पोहोचण्यासाठी 50 फूट खोदाई बाकी असताना बटाट्याने भरलेला ट्रॅक्टर रुतल्याने हा कट उघड झाला.

नकाशा जप्त –

जयपूर उत्तरचे डीसीपी राशी डोगरा यांनी सांगितले की, बोगदा वेळेत शोधला गेला, अन्यथा बदमाशांनी मोठा गुन्हा केला असता. ज्या दुकानातून चोरट्यांनी गुन्ह्यासाठी बोगदा खोदला होता, त्याचा नकाशा जप्त करण्यात आला आहे. बोगद्याच्या आत एलईडी बल्बही लावण्यात आले असून बोगदा खोदण्यासाठी साधनेही सापडली आहेत. ही टोळी उत्तर प्रदेशातील बरेली येथील असून, सुमारे 4-5 महिन्यांपासून बोगदे खोदण्याचे काम करत होती. दुकानात सापडलेल्या नकाशाच्या आधारे एसबीआय बँकेत दरोडा टाकण्याचा कट होता. घटनास्थळी एका तरुणाला ताब्यात घेण्यात आले असून त्याच्याकडे चौकशी केल्यानंतरच अधिक माहिती समोर येईल.

खताच्या बहाण्याने दुकान उघडले –

दुकानात राहणारे चोरटे रात्रीच्या वेळी बोगदा खोदण्याचे काम करत असत आणि संशय येऊ नये म्हणून खताचे काम करत असल्याचे सांगितले. ई-रिक्षा गाड्यांमध्ये माती वाहून नेत असत आणि व्यापाऱ्यांना वाटायचे की ते खत घेऊन जात आहेत. मात्र बोगदा उघड झाल्यापासून व्यापारी धास्तावले आहेत.