नवी दिल्ली – लाल किल्ल्याजवळ जैन धर्मीय कार्यक्रमात प्रदर्शित करण्यात आलेला ७६० ग्रॅम वजनाचा सोन्याचा ‘कलश’, ज्यामध्ये हिरे, माणिक आणि पाचू जडवले होते, तो बुधवारी चोरीला गेला, अशी माहिती पोलीस अधिकाऱ्याने शनिवारी दिली.पोलीस अधिकाऱ्यांनी सांगितले की, या कलशामध्ये सुमारे १५० ग्रॅम मौल्यवान रत्ने जडवण्यात आलेली होती आणि त्याची एकूण अंदाजित किंमत सुमारे १ कोटी रुपये आहे.

ही घटना १५ ऑगस्ट पार्कमध्ये सकाळी ९.२० ते १० वाजण्याच्या दरम्यान घडली, जेव्हा हा कलश कार्यक्रमासाठी मंचावर ठेवण्यात आला होता. त्याच वेळी लोकसभेचे अध्यक्ष ओम बिर्ला कार्यक्रमाला उपस्थित राहण्यासाठी आले होते आणि त्यांचे स्वागत करण्यासाठी गर्दी झाल्याने मंचाकडे लक्ष राहिले नाही, असे अधिकाऱ्यांनी सांगितले.

तक्रारदार सुधीर जैन, सिव्हिल लाईन्सचे रहिवासी आणि व्यावसायिक, यांनी पोलिसांना सांगितले की, हा कलश ते दररोज पूजा विधीसाठी कार्यक्रमात आणत होते. २८ ऑगस्टपासून सुरू झालेला हा धार्मिक समारंभ ९ सप्टेंबरपर्यंत चालणार आहे.विधींसाठी एक विशेष मंच उभारण्यात आला होता, जिथे फक्त पारंपरिक धोती-कुर्ता परिधान केलेल्या अधिकृत व्यक्तींनाच बसण्याची परवानगी होती.

पोलीस अधिकाऱ्यांनी सांगितले की, मंगळवारी सुधीर जैन यांनी पुन्हा हा कलश कार्यक्रमस्थळी आणून निश्चित केलेल्या जागेवर ठेवला. प्रार्थना सुरू असताना लोक सभोवताल बसले होते. याच वेळी लोकसभा अध्यक्ष ओम बिर्ला कार्यक्रमस्थळी आले, आणि आयोजक व उपस्थित भक्तगण त्यांचे स्वागत करण्यासाठी पुढे गेले. त्यामुळे मंचाकडे लक्ष राहिले नाही.

जेव्हा पुन्हा मंचाकडे लक्ष गेले, तेव्हा कलश गायब झाला होता.सुरुवातीला हा कलश चुकीने दुसरीकडे नेल्याचा समज झाला, परंतु कार्यक्रम संपल्यानंतरही तो सापडला नाही, म्हणून सुधीर जैन यांनी कोतवाली पोलीस ठाण्यात ऑनलाइन एफआयआर नोंदवली.पोलीसांनी प्राथमिक तपासानंतर सांगितले की, संशयिताने काही दिवस आधीपासून या कार्यक्रमस्थळी वेशांतर करून ‘रेकी’ केली होती. तो पारंपरिक धोती-कुर्त्यात येत असे, भक्तांमध्ये मिसळला आणि आयोजकांशी ओळख वाढवली. अखेर संधी मिळताच त्याने मंचावरून कलश चोरून नेला आणि पसार झाला.

दिल्ली पोलिसांनी सांगितले की, सीसीटीव्ही फुटेजमध्ये एका संशयिताचे हालचाली कैद झाल्या असून त्याची ओळख पटली आहे.कार्यक्रमाचे आयोजक पुणीत जैन यांनी सांगितले की, “कलशासोबतच काही बॅग्स व इतर मौल्यवान वस्तूही चोरीस गेल्या आहेत. दिल्लीसह इतर राज्यांमधून अनेक भक्त या समारंभासाठी आले होते. आम्ही सीसीटीव्ही फुटेज पोलिसांना सुपूर्द केले आहे. लवकरच आरोपीला अटक होईल, अशी आम्हाला आशा आहे.”