प्रभात वृत्तसेवा
पुणे – जैन बोर्डिंग जमीन प्रकरणाबाबत नेमके पहिल्या दिवसापासून शेवटपर्यंत काय काय झाले, याबाबत आगामी काळात योग्य वेळ आल्यावर नक्कीच बोलणार असल्याचे खासदार व केंद्रीय राज्यमंत्री मुरलीधर मोहोळ यांनी स्पष्ट केले आहे.जैन बोर्डिंग जमीन प्रकरणाबाबत मुरलीधर मोहोळ यांच्यावर आरोप करण्यात आले होते. त्यामुळे हे प्रकरण वादग्रस्त ठरले होते. अखेर धर्मादाय आयुक्तांनी जमीन विक्रीचे व्यवहार रद्द करण्याचा निर्णय दिल्याने गेल्या काही दिवसांपासून या मुद्द्यावरून सुरू असलेल्या वादावर पडदा पडला.

धर्मादाय आयुक्तांच्या निकालानंतर मुरलीधर मोहोळ यांनी पत्रकांराशी संवाद साधला.या प्रकरणात माझा काहीच संबंध नसल्याचे पुराव्यानिशी मांडले आहे. जैन समाज, ट्र्स्ट, बिल्डर यांच्यापुरता हा विषय मर्यादित असताना काहींनी स्वार्थ साधण्यासाठी माझे नाव या प्रकरणात गोवण्याचे राजकारण केले. खालच्या पातळीवर जाऊन आरोपही करण्यात आले, असे मोहोळ यांनी सांगितले. मात्र, अशा प्रसंगात भाजप पक्ष व नेते पाठीशी उभे राहिल्याचेही त्यांनी सांगितले.

जमिनीचे प्रकरण पाहात असताना ट्रस्टच्या जुन्या इतिहासात जावे लागेल. जैन समाजबांधवांनी केलेल्या संघर्षामुळे त्यांना न्याय मिळाला आहे. हा निर्णय चांगला झाला आहे. मात्र, पुढील काळात नेमके या जमीन प्रकरणात काय काय झाले, याबाबत सविस्तरपणे म्हणणे मांडणार असल्याचे सूचक वक्तव्यही त्यांनी केले.