Arshad Nadeem Gold Medalist Story :- पाकिस्तानच्या अर्शद नदीमने पॅरिस ऑलिम्पिकमध्ये भालाफेकमध्ये सुवर्णपदक जिंकून देशासाठी ऐतिहासिक कामगिरीची नोंद केली. अर्शदचा इथपर्यंत पोहोचण्याचा प्रवास नक्कीच सोपा नव्हता. त्याच्याकडे ऑलिम्पिकपूर्वी नवीन भालाघेण्यासाठी आवश्‍यक असणारे 88 हजार रुपये देखील नव्हते. ना कुठले विदेशी प्रशिक्षण ना कुठला विशेष डायट, तरीही अर्शदने पाकिस्तानसाठी अभूतपूर्व कामगिरी केली आहे.

पाकिस्तानमधील वृत्तानुसार, अर्शदचे वडील मजूर आहेत. त्याच्यातील क्रीडा टॅलेंट पाहून गावातील लोकांनी अर्शदच्या प्रशिक्षणासाठी पैसे गोळा केले होते. आता मात्र, पाकिस्तानच्या पंजाब प्रांताच्या मुख्यमंत्री मरियम नवाज यांनी नदीमला 10 कोटी रुपयांचे रोख बक्षीस (पाकिस्तानी) जाहीर केले आहे. नदीमने या ऑलिम्पिकमध्ये इतिहास रचला आहे. त्याने 92.97 मीटर भालाफेक केली. याआधी नॉर्स खेळाडू थोरकिल्डसेन अँड्रियासने 2008 मध्ये बीजिंग ऑलिम्पिकमध्ये 90.57 मीटरचा विक्रम केला होता. आता नदीमने हा विक्रम मोडून इतिहास रचला आहे. पाकिस्तानच्या इतिहासात ऑलिम्पिकमधील वैयक्तिक स्पर्धेत एखाद्या खेळाडूने सुवर्णपदक जिंकण्याची ही पहिलीच वेळ होती.

अर्शदचे वडील मुहम्मद अशरफ यांनी मीडियाला सांगितले की, लोकांना माहिती नाही की अर्शद इथपर्यंत कसा पोहोचला. नदीमच्या प्रशिक्षणासाठी लोकांनी पैसे गोळा केले. नदीमसाठी समाजाचा हा पाठिंबा खूप महत्त्वाचा होता, कारण सुरुवातीच्या काळात त्याच्याकडे इतर शहरांमध्ये प्रवास करण्यासाठी आणि ट्रेन करण्यासाठीही आवश्यक पैसे नव्हते. आर्थिक अडचणींमुळे अर्शदला जुना भाला घेऊन सराव करावा लागत असल्याचेही त्यांनी सांगितले. या भाल्याचेही नुकसान झाले आणि त्याला अनेक वर्षे आंतरराष्ट्रीय स्तराचा नवीन भाला विकत घेता आला नाही. त्याने मात्र, खराब झालेल्या भाल्यासहच सराव सुरू ठेवला.

अर्शदची कारकीर्द

2015 मध्ये, नदीमने भालाफेक स्पर्धांमध्ये भाग घेण्यास सुरुवात केली आणि अल्पावधीतच त्याने आपली छाप सोडली. 2016 मध्ये, त्याने भारतातील दक्षिण आशियाई क्रीडा स्पर्धेत 78.33 मीटरच्या राष्ट्रीय विक्रमासह कांस्यपदक जिंकले. त्यानंतर 2019 मध्ये दोहा येथे झालेल्या जागतिक अँथलेटिक्स चॅम्पियनशिपमध्ये नदीमने आपली क्षमता सिद्ध केली. अर्शदने 2020 टोकियो ऑलिम्पिकमध्ये 86.62 मीटर भालाफेक करून पाचवे स्थान मिळविले होते. यापूर्वी नदीमचा कारकिर्दीतील सर्वोत्तम थ्रो 90.18 मीटर होता. अशाप्रकारे 90 मीटरचा टप्पा पार करणारा तो पहिला आशियाई खेळाडू ठरला.

Paris Olympics 2024 (Athletics) : टोकियोपेक्षा चांगली कामगिरी, तरीही नीरजच्या हाती लागलं रौप्यपदक…

पाकिस्तानचे एकंदर तिसरे ऑलिम्पिक पदक

नदीमने गुरुवारी पाकिस्तानसाठी पहिले सुवर्णपदक जिंकले. देशाचे हे तिसरे ऑलिम्पिक पदक आहे. यापूर्वी पाकिस्तानने 1960 मध्ये रोम येथे कुस्ती आणि 1988 मध्ये सेऊल येथे बॉक्सिंगमध्ये पदके जिंकली होती. पाकिस्तानने पॅरिस ऑलिम्पिकसाठी सात खेळाडू पाठवले होते, मात्र त्यांच्या स्पर्धेत केवळ नदीमच अंतिम फेरीसाठी पात्र ठरू शकला. सुवर्णपदक जिंकल्यानंतर त्याच्या गावात जल्लोषाचे वातावरण आहे.