IT Dept raids County Group’s office | दिल्ली- एनसीआरमधील एका मोठ्या बिल्डरच्या ऑफिसवर आयकर विभागाकडून छापेमारी करण्यात आली आहे. या छापेमारीमध्ये 50 कोटी रुपयांपेक्षा अधिक किंमतीच्या वस्तू व रोख रक्कम जप्त करण्यात आली आहे.

दिल्ली-एनसीआरमधील काउंटी ग्रुप आणि त्याच्याशी संबंधित कंपन्यांच्या ठिकाणांवर आयकर विभागाकडून छापेमारी करण्यात आली. मागील 4 दिवसांपासून हा तपास सुरू आहे. या छापेमारीमध्ये 50 कोटी रुपयांपेक्षा जास्त किंमतीचे सोने-चांदी, रोख रक्कम व इतर वस्तू सापडल्या आहेत. याशिवाय, प्लॅट्सची विक्री करताना 600 कोटींपेक्षा अधिक रक्कम रोख स्वरुपात घेण्यात आल्याचे पुरावे देखील सापडले आहेत.

रोख स्वरुपातून घेण्यात आलेली रक्कम गौतम बुद्ध नगर आणि दिल्ली येथील समूहाच्या सहा प्रकल्पांमधील फ्लॅट्सच्या विक्री दरम्यान घेण्यात आली. विविध ठिकाणांहून 10 कोटी रुपये रोख, 40 कोटी रुपयांपेक्षा जास्त किमतीचे दागिने आणि सोने जप्त करण्यात आले. या रक्कमेत अजूनही वाढ होण्याची शक्यता आहे.

काय आहे संपूर्ण प्रकरण?

काउंटी ग्रुप हा दिल्ली-एनसीआरमधील प्रसिद्ध बिल्डर आहे. हे प्रकरण रोख व्यवहार आणि पैसे इतरत्र वळवण्याचे आहे. आयकर विभागाने कंपनीशी संबंधित लॅपटॉप आणि खात्याशी संबंधित कागदपत्रांची छाननी सुरू केली आहे. आतापर्यंत अनेक कागदपत्रे जप्त करण्यात आली आहेत.

नोएडा, गाझियाबाद आणि मेरठमध्येही तपास सुरू आहे. एकूण 30 ठिकाणी तपास सुरू असून, विविध पथकं यावर काम करत आहेत.

रिपोर्टनुसार, या ग्रुपमध्ये शेल कंपन्यांद्वारे मोठी हेराफेरी केली असल्याचे सांगितले जात आहे. सर्व व्यवहार रोखीने केले जात होते. या बिल्डरकडून मोठे व महागड्या प्लॅट्सची ग्राहकांकडून रोख रक्कम घेऊन विक्री केली जात होती.

तपासात कोलकातामध्ये 4 ते 5 शेल कंपन्या असल्याचे समोर आले आहे. तपास पथकांकडून कागदपत्रांची छाननी केली जात आहे. या कंपन्यांद्वारे मोठ्या प्रमाणात पैसा इतरत्र फिरवण्यात आला. आयकर विभाग गेल्या काही काळापासून कंपनीच्या खात्यांवर लक्ष ठेवून होता. करचुकवेगिरीबाबत ठोस पुरावे आणि माहिती मिळाल्यानंतर विभागाकडून छापेमारी करण्यात आली.