Income Tax Notice | उत्पन्न जास्त असले तरीही कर भरण्यास टाळाटाळ करणाऱ्यांचा आकडा मोठा आहे. अशा कर चुकवेगिरी करणाऱ्यांना आयकर विभागाकडून नोटीस बजावली जाते. मात्र, दिवसाची कमाईच केवळ 400 रुपये असताना 7.79 कोटी रुपयांची नोटीस आली तर? एवढ्या मोठ्या रक्कमेची नोटीस बजावल्यास कोणालाही धक्का बसेल. असेच, काहीसे उत्तर प्रदेशच्या अलीगढ येथे ज्यूस विकणाऱ्या मोहम्मद रईस यांच्यासोबत घडले आहे.

आयकर विभागाने मोहम्मद रईस यांना 7.79 कोटी रुपयांच्या टर्नओव्हरवर नोटीस जारी केली आहे. या नोटीसनंतर रईस यांचे पूर्ण कुटुंब घाबरले आहे. त्यांच्या पॅन कार्डाचा वापर करून 7.79 कोटी रुपयांची खरेदी-विक्री केली गेली आहे. आता त्यांना आयकर विभागाकडून 7.79 कोटी रुपयांच्या खरेदी-विक्रीवर नोटीस बजावण्यात आली.

मोहम्मद रईस यांचे अलीगढमध्ये छोटेसे ज्यूसचे दुकान आहे. त्यांची दिवसाची कमाई 400-500 रुपये आहे. मात्र, आयकर विभागाकडून भल्या मोठ्या रक्कमेची नोटीस बजावण्यात आल्याने ते चक्रावून गेले. एवढ्या मोठ्या रक्कमेच्या खरेदी-विक्रीनंतर देखील आयटीआर का नाही भरले? याबाबत आयकर विभागाकडून त्यांना विचारण्यात आले.

या नोटीसबाबत आयकर विभागाच्या अधिकाऱ्यांनी माहिती दिली की, रईस यांच्या  पॅन कार्डवर 2021-22 मध्ये 7.89 कोटी रुपयांची खरेदी-विक्रीची माहिती आयकर विभागाच्या सर्व्हरमधून समोर आली. त्याआधारावरच नोटीस जारी करण्यात आली.

या प्रकरणात दीपक शर्मा नावाच्या एक व्यक्तीचे नाव देखील समोर आले आहे. तसेच, पंजाबमधील एक-दोन फर्म संचालकांचेही निवेदन नोंदवले गेले आहे. आयकर विभागाने माहिती दिली की, रईस यांच्या पॅन कार्डाचा वापर पंजाबमधील विधानसभा निवडणुकीदरम्यान करण्यात आला.

आता नोटीस मिळाल्यानंतर ज्यूस विक्रेत्याने सीएच्या माध्यमातून आयकर विभागाच्या अधिकाऱ्यांकडून नोटीसची माहिती घेतली. याबाबत फसवणुकीचा गुन्हा दाखल केल्यानंतर ही केस निकाली निघेलतसेच, यानंतर याप्रकरणात जो कोणी व्यक्ती जबाबदार असल्यास त्याच्यापर्यंत पोहोचता येईल, असे अधिकाऱ्यांनी सांगितले.