तेल अविव : इस्रायलचे रणगाडे प्रथमच गाझा पट्ट्यातील देर अल-बलाह शहराच्या दक्षिणेकडील आणि पूर्वेकडील भागांमध्ये दाखल झाले आहेत. या भागात हमासच्या दहशतवाद्यांनी काही ओलिसांना दडवून ठेवल्याचा संशय असल्याचे इस्रायली सैन्यदलाने म्हटले आहे. रणगाड्यांमधून डागलेल्या तोफगोळ्यांमुळे ८ घरे आणि ३ मशिदींना लक्ष्य करण्यात आले. या माऱ्यात किमान ३ पॅलेस्टिनी मारले गेले तर इतर अनेक जण जखमी झाले असल्याचे गाझामधील माध्यमांनी म्हटले आहे.

गाझाच्या मध्य भागातून पॅलेस्टिनी रहिवाशांनी तात्काळ दक्षिणेकडे निघून जावे, असे आदेशच इस्रायली सैन्याने कालच दिले आहेत. छापे आणि बॉम्बहल्ल्यामुळे डझनभर कुटुंबे पळून गेली आणि पश्चिमेकडे देर अल-बलाह आणि जवळच्या खान युनूसच्या किनारी भागात गेली आहेत. सोमवारी खान युनूसमध्ये इस्रायली हवाई हल्ल्यात एका तंबूत वास्तव्य करणारे एक दाम्पत्य आणि त्यांच्या दोन मुलांसह किमान पाच जण ठार झाले.

इस्रायली सैन्य देर अल-बलाह जिल्ह्यामध्ये घुसलेले नाही, असे इस्रायली सैन्याने म्हटले आहे. सैन्य आतापर्यंत बाहेर राहण्याचे कारण म्हणजे त्यांना शंका आहे की हमासने तेथे लोकांना ओलिस ठेवले असावे, असे इस्रायली सूत्रांनी सांगितले आहे. गाझामध्ये बंदिवासात असलेल्या उर्वरित ५० बंधकांपैकी किमान २० जण अजूनही जिवंत असल्याचे मानले जाते आहे.