Iran Blast : अमेरिकेसोबत वाढलेल्या तणावाच्या पार्श्वभूमीवर इराणच्या दक्षिणेकडील बंदर शहर बंदर अब्बासमध्ये शक्तिशाली स्फोट झाल्याची धक्कादायक घटना समोर आली आहे. या स्फोटात आठ मजली निवासी इमारत मोठ्या प्रमाणात कोसळली असून परिसरातील अनेक वाहने आणि दुकाने नुकसानग्रस्त झाली आहेत. स्फोटाचं नेमकं कारण अद्याप स्पष्ट झालेलं नाही. मोआलेम बुलेव्हार्डवरील इमारतीत स्फोट इराणी सरकारी माध्यमांनुसार, बंदर अब्बास शहरातील मोआलेम बुलेव्हार्ड परिसरात असलेल्या आठ मजली बहुमजली इमारतीत हा स्फोट झाला. स्फोटामुळे इमारतीचे किमान दोन मजले पूर्णपणे उद्ध्वस्त झाले आहेत. स्फोटाचा आवाज दूरवर ऐकू आल्याचं स्थानिकांनी सांगितलं असून, त्यामुळे परिसरात भीतीचं वातावरण पसरलं आहे. बचावकार्य युद्धपातळीवर घटनेनंतर अग्निशमन दल, आपत्कालीन सेवा आणि बचाव पथके तातडीने घटनास्थळी दाखल झाली. ढिगाऱ्याखाली अडकलेल्या नागरिकांचा शोध सुरू असून, स्फोटानंतर लागलेल्या आगीवर नियंत्रण मिळवण्याचे प्रयत्न सुरू आहेत. जखमींची संख्या आणि जीवितहानीबाबत अधिकृत आकडेवारी अद्याप जाहीर करण्यात आलेली नाही. लष्करी पार्श्वभूमीमुळे संशय वाढला या स्फोटाच्या ठिकाणी इराणी रिव्होल्यूशनरी गार्ड कॉर्प्स (IRGC) शी संबंधित गेस्टहाऊस असल्याचा दावा काही माध्यमांतून केला जात आहे, मात्र याबाबत अद्याप अधिकृत दुजोरा मिळालेला नाही. दरम्यान, इस्रायलने या घटनेशी कोणताही संबंध नसल्याचं स्पष्ट केलं आहे. इराणी लष्कर सतर्क या घटनेनंतर इराणी लष्करप्रमुख अमीर हतामी यांनी निवेदन जारी करत, इराणी सैन्य पूर्णपणे सतर्क असून कोणत्याही संभाव्य हल्ल्याला प्रत्युत्तर देण्यासाठी सज्ज असल्याचं सांगितलं आहे. अमेरिकन लष्करी हालचाली वाढलेल्या असताना हा स्फोट झाल्यामुळे आंतरराष्ट्रीय स्तरावरही या घटनेकडे गंभीरपणे पाहिलं जात आहे.