Gold Rate Today : जागतिक बाजारातील तेजी आणि अमेरिका-इराणमधील वाढत्या तणावामुळे सुरक्षित गुंतवणुकीची मागणी वाढल्याने सोन्याच्या दरात सोमवारी मोठी वाढ झाली. दिल्लीच्या सराफा बाजारात 99.9 टक्के शुद्धतेच्या सोन्याचा भाव 900 रुपयांनी वाढून 1 लाख 64 हजार 400 रुपये प्रति 10 ग्रॅम झाला. सर्व करांसह हा दर आहे. शुक्रवारी सोन्याचा भाव 1 लाख 63 हजार 500 रुपये होता.

सोन्याचा हा दर पाच महिन्यांहून अधिक काळातील उच्चांक ठरला आहे. यापूर्वी 9 मार्च रोजी सोन्याचा भाव 1 लाख 64 हजार 300 रुपये प्रति 10 ग्रॅम होता.

दरम्यान, चांदीच्या दरातही सलग तिसऱ्या दिवशी तेजी पाहायला मिळाली. चांदीचा भाव तब्बल 3,500 रुपयांनी वाढून 2 लाख 53 हजार 500 रुपये प्रति किलो झाला. हा चार महिन्यांहून अधिक काळातील उच्चांक आहे. मागील सत्रात चांदीचा भाव 2 लाख 50 हजार रुपये होता. यापूर्वी 17 एप्रिल रोजी चांदी 2 लाख 53 हजार रुपये प्रति किलोवर होती.

लेमन मार्केट्स डेस्कचे संशोधन प्रमुख गौरव गर्ग यांनी सांगितले की, अमेरिकन डॉलर कमजोर झाल्याने आणि अमेरिका-इराण तणावाच्या पार्श्वभूमीवर सुरक्षित गुंतवणुकीची मागणी वाढल्याने देशांतर्गत बाजारात सोन्या-चांदीच्या दरांना आधार मिळाला.

आंतरराष्ट्रीय बाजारातही सोन्याच्या दरात तेजी कायम राहिली. स्पॉट सोन्याचा भाव 42.45 डॉलर म्हणजेच सुमारे 1 टक्क्याने वाढून 4,646.54 डॉलर प्रति औंस झाला. चांदीचा भाव मात्र 69 डॉलर प्रति औंसवर स्थिर राहिला.

कोटक सिक्युरिटीजच्या कायनात चेनवाला यांच्या मते, जागतिक बाजारात सोन्याचा भाव 4,650 डॉलर प्रति औंसच्या दिशेने पुढे जात आहे. मात्र, पुढील काळातील तेजी केवळ भू-राजकीय परिस्थितीवर नाही, तर महागाईच्या आकडेवारीवरही अवलंबून राहणार आहे.

अमेरिकेतील वाढत्या तेलाच्या किमतींच्या पार्श्वभूमीवर फेडरल रिझर्व्हची भूमिका महत्त्वाची ठरणार आहे. या आठवड्यातील US Core PCE महागाईचा डेटा आणि Jackson Hole Symposium मधील फेडचे अध्यक्ष केविन वॉर्श यांचे पहिले भाषण याकडे गुंतवणूकदारांचे लक्ष असेल. या संकेतांवर अमेरिकेच्या व्याजदर कपातीबाबत पुढील दिशा स्पष्ट होऊ शकते.