US Israel Iran War: इराण आणि इस्राएल यांच्यातील संघर्षाच्या ज्वाळा आता संपूर्ण मध्य पूर्वेला (Middle East) वेढू लागल्या आहेत. इराणने आपल्या हल्ल्यांची व्याप्ती वाढवत इराकची राजधानी बगदाद येथील अमेरिकी दूतावास आणि संयुक्त अरब अमिरातीमधील (UAE) दुबई शहरावर ड्रोन हल्ले केले आहेत. या घटनांमुळे खाडी देशांतील तणाव आतापर्यंतच्या सर्वोच्च पातळीवर पोहोचला असून जागतिक चिंता वाढली आहे. बगदादमधील अमेरिकी दूतावासावर थेट हल्ला – इराकची राजधानी बगदादमधील अत्यंत सुरक्षित मानल्या जाणाऱ्या ‘ग्रीन झोन’ मध्ये असलेल्या अमेरिकी दूतावासावर मंगळवारी मोठा हल्ला झाला. इराणने डागलेले दोन स्फोटकयुक्त ड्रोन थेट दूतावास परिसरात घुसले. त्यामुळे दूतावासात भीषण आग लागली आणि सर्वत्र धुराचे लोट पसरले. हल्ल्यानंतर लगेचच सायरन वाजू लागले; मात्र दूतावासाची प्रगत संरक्षण यंत्रणा हे ड्रोन रोखण्यात अपयशी ठरली. इराकच्या गृह मंत्रालयाच्या सूत्रांनीही सुरक्षा साखळी भेदून ड्रोन आत घुसल्याची पुष्टी केली आहे. तेल क्षेत्रांवरही घाव – राजनयिक ठिकाणांसोबतच इराणने ऊर्जा आणि तेल सुविधांनाही लक्ष्य केले. इराकच्या तेल मंत्रालयाच्या माहितीनुसार, दक्षिण इराकमधील मजनून तेल क्षेत्रावर दोन ड्रोन हल्ले करण्यात आले. यातील एक ड्रोन तेथे कार्यरत एका अमेरिकी कंपनीच्या कार्यालयाजवळ कोसळला, तर दुसरा दूरसंचार मनोऱ्यावर आदळला. दुबई विमानतळाजवळ इंधन टँकरला आग – बगदादसोबतच इराणच्या ड्रोनने दुबई आंतरराष्ट्रीय विमानतळाजवळ एका इंधन टँकरवर आघात केला. जोरदार स्फोट होऊन आगीच्या ज्वाळा उसळल्या. प्रवासी आणि कर्मचाऱ्यांच्या सुरक्षेसाठी दुबई नागरी उड्डाण प्राधिकरणाने तातडीने अलर्ट जारी केला आणि विमानतळावरील उड्डाणे तात्पुरती थांबवण्यात आली. दुबईच्या नागरी संरक्षण पथकांनी तत्परता दाखवत आग लवकरच विझवली. या घटनेत कोणतीही जीवितहानी झाल्याची वृत्त नाही. हेही वाचा – : केरळ विधानसभा निवडणुकीसाठी काँग्रेसची 55 उमेदवारांची पहिली यादी जाहीर; भाजपचेही 47 उमेदवार घोषित इस्राएलवरही हल्ले सुरूच; ७ जखमी – दुसरीकडे इस्राएलवरही हल्ले थांबलेले नाहीत. इराणपुरस्कृत लेबनानी संघटना हिजबुल्लाहने इस्राएलच्या नहरिया शहरावर सलग क्षेपणास्त्रे डागली, ज्यामुळे शहरात मोठी हानी झाली. अनेक इमारती उद्ध्वस्त झाल्या असून मदत व बचाव पथके ढिगाऱ्याखाली अडकलेल्यांना शोधण्यासाठी झटत आहेत. वेस्ट बँक आणि बितार इलित वस्तीच्या आकाशातही डझनभर क्षेपणास्त्रे दिसली. इस्राएलच्या संरक्षण यंत्रणेने वेस्ट बँकवरील अनेक क्षेपणास्त्रे नष्ट केली. या ताज्या हल्ल्यांमध्ये ७ हून अधिक जण जखमी झाल्याची माहिती आहे. याआधी इराकच्या निमलष्करी संघटनेने (PMF) दावा केला होता की सीरिया सीमेजवळील अल-कायम शहरात इस्राएली हल्ल्यात त्यांचे ६ सदस्य ठार झाले. जागतिक चिंता; तेल पुरवठ्यावर परिणामाची भीती – या हल्ल्यांमुळे इराणने खाडी देशांतील आपले रणनीतिक हल्ले तीव्र केल्याचे स्पष्ट झाले आहे. होर्मुझ सामुद्रधुनीसारख्या महत्त्वाच्या जलमार्गांच्या सुरक्षिततेबाबत जागतिक चिंता वाढली असून या हल्ल्यांचा थेट परिणाम जगभरातील कच्च्या तेलाच्या पुरवठ्यावर होऊ शकतो, अशी भीती अमेरिकी राष्ट्राध्यक्ष डोनाल्ड ट्रम्प यांच्यासह अनेक जागतिक नेत्यांनी व्यक्त केली आहे. अमेरिका आणि मित्र देश या तणावपूर्ण परिस्थितीनंतर पुढील सुरक्षा रणनीती आखण्यात गुंतले आहेत.
