IPS Officer Transfer : हरियाणाच्या पोलिस प्रशासनात शनिवारी रात्री एक अनपेक्षित आणि मोठा राजकीय-प्रशासकीय भूकंप घडला. संपूर्ण राज्य गाढ झोपेत असताना सरकारने अचानक १३ वरिष्ठ आयपीएस अधिकाऱ्यांसह (IPS Officer Transfer) तब्बल ३५ उच्चपदस्थ पोलिस अधिकाऱ्यांच्या तडकाफडकी बदल्यांचे आदेश जारी करून सर्वांनाच चक्रावून सोडले.

यामध्ये अनेक वजनदार अधिकाऱ्यांच्या खांद्यावरील जबाबदाऱ्यांमध्ये खांदेपालट करत त्यांची राज्यातील विविध जिल्ह्यांत आणि महत्त्वाच्या विभागांमध्ये रवानगी करण्यात आली आहे. या मोठ्या फेरबदलात सर्वात लक्षवेधी ठरली ती आयपीएस अधिकारी नवदीप सिंग विर्क यांची बदली.

आतापर्यंत हरियाणा राज्य अंमलबजावणी ब्युरोचे महासंचालक आणि दक्षता व सुरक्षा विभागाचे संचालक पद सांभाळणाऱ्या विर्क यांच्याकडे आता हरियाणा मानवाधिकार आयोगाच्या महासंचालक पदाची धुरा सोपवण्यात आली आहे. त्यांच्या जागेवर आता माता रवी किरण यांची राज्य अंमलबजावणी ब्युरोच्या अतिरिक्त पोलिस महासंचालकपदी नियुक्ती झाली असून, दक्षता आणि सुरक्षेची अतिरिक्त धुराही त्यांच्यावरच (IPS Officer Transfer) सोपवण्यात आली आहे.

दुसरीकडे, विशेष कृती दलाचे नेतृत्व करणारे वरिष्ठ अधिकारी बी. सतीश बालन यांच्याकडे आता रेल्वे आणि कमांडो पोलिस महानिरीक्षकपदाची सूत्रे देण्यात आली आहेत. पंचकुला येथील राज्य दक्षता आणि भ्रष्टाचारविरोधी विभागाच्या पोलिस महानिरीक्षकपदी मनीष चौधरी यांची वर्णी लागली असून, त्यांच्याकडे कारागृह विभागाचा अतिरिक्त पदभारही देण्यात आला आहे.

एकाच वेळी अनेक महत्त्वाच्या जबाबदाऱ्या सांभाळणारे सिमरदीप सिंग आता भोंडसी येथील विशेष कृती दलाचे पोलिस महानिरीक्षक असतील सोबतच झज्जरचे पोलिस आयुक्त आणि इंडिया रिझर्व्ह बटालियनच्या पोलिस महानिरीक्षक पदाची अतिरिक्त जबाबदारीही त्यांच्याकडेच राहील.

जिल्हा आणि शहर पातळीवरही मोठी उलथापालथ पाहायला मिळाली आहे. पदोन्नतीनंतर हमीद अख्तर यांची रोहतक परिक्षेत्राच्या पोलिस महानिरीक्षकपदी नियुक्ती करण्यात आली आहे, तर धीरज कुमार यांच्याकडे पोलिस मुख्यालयासोबत हरियाणा लोकायुक्तच्या पोलिस अधीक्षकपदाचा अतिरिक्त कार्यभार आला आहे.

मानेसरच्या चौथ्या आयआरबी बटालियनच्या अतिरिक्त कमांडंटपदी सुमित कुमार, सोनीपत गोहाना येथे पोलिस उपआयुक्तपदी विक्रांत भूषण, सोनीपत गुन्हे शाखेत जितेंद्र गेहलावत, तर सायबर सिटी गुरुग्रामच्या वाहतूक विभागाच्या पोलिस उपआयुक्तपदी हितेश यादव यांची नियुक्ती झाली आहे. अचानक रात्रीच्या सुमारास झालेल्या या बदलीसत्रामुळे संपूर्ण प्रशासकीय वर्तुळात (IPS Officer Transfer) खळबळ उडाली आहे.