IPL 2027 Auction : आयपीएल २०२७ च्या लिलावाची तारीख अन् ठिकाण फायनल; पाहा कधी आणि कुठे रंगणार थरार?
IPL 2027 Auction : आयपीएलचा २० वा हंगाम २०२७ साली खेळवला जाणार असून, त्यासाठी बीसीसीआयने तयारी सुरू केली असून आता ठिकाण आणि तारीखही निश्चित झाली आहे.
IPL 2027 Mini Auction Date and Venue Finalised in Goa on December 16 : इंडियन प्रीमियर लीगच्या २०२७ मधील २०व्या हंगामाची जोरदार तयारी सर्व दहा फ्रँचायझींनी आत्तापासूनच सुरू केली आहे. याच पार्श्वभूमीवर भारतीय क्रिकेट नियामक मंडळाने आगामी हंगामासाठी होणाऱ्या मिनी लिलावाचे ठिकाण आणि तारीख निश्चित केली आहे. मागील काही लिलाव परदेशात आयोजित केल्यानंतर बीसीसीआयने यंदा हा लिलाव भारतातच घेण्याचा निर्णय घेतला असून, यासाठी गोव्याची निवड केली आहे. हा बहुप्रतिक्षित मिनी लिलाव १६ डिसेंबर रोजी गोव्यात पार पडणार असल्याचे समोर आले आहे.
१६ डिसेंबरला आयटीसी ग्रँड गोव्यात रंगणार लिलाव –
क्रिकबझच्या वृत्तानुसार, १६ डिसेंबर रोजी गोव्यातील आलिशान पंचतारांकित हॉटेल आयटीसी ग्रँड येथे खेळाडूंचा लिलाव होणार आहे. बीसीसीआयच्या लॉजिस्टिक्स पथकाने १७ ऑक्टोबर रोजी सर्व फ्रँचायझींना व्हॉट्सॲप मेसेजद्वारे ही प्राथमिक माहिती दिली आहे. या संदेशानुसार, १५ डिसेंबर रोजी लिलावापूर्वीची अधिकृत बैठक पार पडेल, तर १६ डिसेंबरला प्रत्यक्ष बोली लावली जाईल. अनेक फ्रँचायझींच्या वरिष्ठ अधिकाऱ्यांनी बीसीसीआयकडून असा संदेश मिळाल्याची पुष्टी केली आहे.
प्रवास आणि बुकिंगच्या सोयीसाठी पाठवला प्राथमिक संदेश –
JUST IN 🚨
IPL teams told to prepare for auction on December 16 in Goa. Multiple franchises have confirmed receiving a message from the BCCI logistics team.
#IPL2027 #IPLAuction https://t.co/yAnCwDc3Wc
— Cricbuzz (@cricbuzz) October 17, 2026
फ्रँचायझी मालकांना किंवा सीईओंना याबाबतचा अधिकृत ई-मेल अद्याप प्राप्त झालेला नाही. मात्र, ऐन पर्यटन हंगामात विमानांची तिकिटे आणि हॉटेल बुकिंग वेळेत करता यावीत, यासाठी बीसीसीआयच्या व्यवस्थापन चमूने हा पूर्वसूचना देणारा संदेश पाठवला आहे. या तारखांमध्ये पुढे काही बदल होणार की नाही, हे अद्याप स्पष्ट नसले तरी लवकरच मंडळाकडून अधिकृत ई-मेल जारी करून लिलावाची औपचारिक घोषणा केली जाईल.
लिलावाच्या दिवशी भारत-श्रीलंका वनडे सामना –
विशेष म्हणजे ज्या दिवशी हा लिलाव रंगणार आहे, त्या काळात भारतीय क्रिकेट संघ मायदेशात श्रीलंकेविरुद्ध तीन सामन्यांची एकदिवसीय मालिका खेळत असेल. १६ डिसेंबर रोजीच बंगळुरूच्या एम. चिन्नास्वामी स्टेडियमवर मालिकेतील दुसरा एकदिवसीय सामना रंगणार आहे. त्यामुळे एकाच दिवशी मैदानावर भारत-श्रीलंका सामना आणि गोव्यात खेळाडूंच्या कोट्यवधींच्या बोलीचा थरार पाहायला मिळणार आहे.
