CSK Michael Hussey : आयपीएल २०२७ पूर्वी सीएसकेमध्ये मोठा फेरबदल! हेड कोच पाठोपाठ १५ वर्षांनंतर ‘या’ खेळाडूने सोडली साथ
CSK Michael Hussey : चेन्नई सुपर किंग्सने एक महत्त्वपूर्ण पाऊल उचलले आहे. वरिष्ठ प्रशिक्षण मंडळात ऐतिहासिक बदल आधीच करण्यात आले आहेत.
IPL 2027 CSK Parts Ways With Michael Hussey After 15 Years Zaheer Khan : आयपीएल २०२७ च्या (IPL 2027) लिलावापूर्वी पाच वेळची चॅम्पियन फ्रँचायझी चेन्नई सुपर किंग्सने (CSK) आपल्या सपोर्ट स्टाफमध्ये क्रांतिकारी बदलांना सुरुवात केली आहे. वृत्तसंस्थांच्या माहितीनुसार, सीएसकेने आपले दिग्गज फलंदाजी प्रशिक्षक मायकल हसी (Michael Hussey) यांच्याशी नाते तोडण्याचा मोठा निर्णय घेतला आहे. या निर्णयामुळे ‘मिस्टर क्रिकेट’ म्हणून ओळखल्या जाणाऱ्या या ऑस्ट्रेलियन दिग्गजाचा खेळाडू आणि प्रशिक्षक अशा दोन्ही भूमिकांमधील १५ वर्षांचा ऐतिहासिक प्रवास संपुष्टात आला आहे.
२०१८ पासून फलंदाजी प्रशिक्षक; अनेक जेतेपदांमध्ये मोलाचा वाटा!
मायकल हसी २०१८ पासून सातत्याने सीएसकेच्या फलंदाजी प्रशिक्षकपदाची धुरा सांभाळत होते. माजी मुख्य प्रशिक्षक स्टीफन फ्लेमिंग यांच्या साथीने त्यांनी सीएसकेला चॅम्पियन बनवण्यात मोलाची भूमिका बजावली. व्यवस्थापनाने हसी यांना या निर्णयाची अधिकृत कल्पना दिली आहे. दरम्यान, हसी इतर आयपीएल फ्रँचायझींच्या संपर्कात असून, २०२७ च्या मोसमात ते दुसऱ्या संघाच्या कोचिंग स्टाफमध्ये दिसण्याची दाट शक्यता वर्तवली जात आहे.
झहीर खान नवे हेड कोच; मोहित शर्माकडे गोलंदाजीची धुरा!
An era in yellow draws to a close. 💛🏏
Chennai Super Kings have reportedly parted ways with batting coach Michael Hussey ahead of IPL 2027, ending a long association spanning his contributions as both player and coach.
.
.
.
#MichaelHussey #MikeHussey #CSK https://t.co/FzIGxfCIqi
— cricketfastliveline (@cfll_official) October 10, 2026
मायकल हसी यांच्या जाण्यानंतर सीएसकेने अद्याप नव्या फलंदाजी प्रशिक्षकाची घोषणा केलेली नाही. मात्र, याआधीच फ्रँचायझीने सपोर्ट स्टाफमध्ये मोठे फेरबदल केले आहेत. दीर्घकाळ मुख्य प्रशिक्षक राहिलेल्या स्टीफन फ्लेमिंग यांच्या जागी भारताचा माजी वेगवान गोलंदाज झहीर खानची मुख्य प्रशिक्षकपदी नियुक्ती करण्यात आली आहे; तर माजी गोलंदाज मोहित शर्माकडे गोलंदाजी प्रशिक्षकपदाची जबाबदारी सोपवण्यात आली आहे.
पिवळ्या जर्सीत बॅटनेही गाजवले मैदान; ५० सामन्यांत १,७६८ धावा!
प्रशिक्षणापूर्वी हसी हे चेन्नईच्या फलंदाजीचा मुख्य कणा होते. २००८ च्या पहिल्या हंगामापासून सीएसकेशी जोडले गेलेले हसी २०१३ पर्यंत खेळले. २०१४ मध्ये मुंबई इंडियन्सकडून खेळल्यानंतर २०१५ मध्ये ते पुन्हा चेन्नईत परतले. खेळाडू म्हणून त्यांनी ५० सामन्यांत ४२.१० च्या उत्कृष्ट सरासरीने १,७६८ धावा कुटल्या होत्या.
