KKR vs LSG Indian Premier League 2024 : आज, IPL 2024 च्या 28 व्या सामन्यात, कोलकाता नाइट रायडर्स (KKR) लखनौ सुपरजायंट्सचा सामना करत आहे. हा सामना कोलकात्याच्या ईडन गार्डन्सवर खेळला जात आहे. कोलकाता आणि लखनौ या दोन्ही संघांना त्यांच्या शेवटच्या सामन्यात पराभवाचा सामना करावा लागला होता, त्यामुळे दोन्ही संघ विजयी मार्गावर परतण्याचा प्रयत्न करतील.
या सामन्यात केकेआरने नाणेफेक जिंकून प्रथम गोलंदाजी करण्याचा निर्णय घेतला आहे. लखनौ संघाने या सामन्यासाठी विशेष बदल केला असून संघातील सदस्य कोलकात्याचा प्रसिद्ध फुटबॉल क्लब ‘मोहन बागान’च्या जर्सीच्या रंगांसारखा जर्सी परिधान करून मैदानात उतरले आहेत.
Green & Maroon. Us & You. See you tomorrow 💚♥️ pic.twitter.com/8D8uzFsVU0
— Lucknow Super Giants (@LucknowIPL) April 13, 2024
लखनौ सुपरजायंट्स आणि मोहन बागान क्लब हे प्रसिद्ध उद्योगपती संजीव गोयंका यांच्या मालकीचे आहेत, त्यामुळे कोलकाता येथे होणाऱ्या सामन्यासाठी लखनौ संघानं मोहन बागानच्या जर्सीच्या रंगासारखी जर्सी घालण्याचा निर्णय घेतला आहे. या सामन्यासाठी लखनौचा संघ मरून आणि हिरव्या रंगाची जर्सी घालून मैदानात उतरला आहे. मोहन बागानचीही याच रंगाची जर्सी आहे.
केएल राहुलच्या नेतृत्वाखालील संघ मरून आणि हिरव्या रंगाच्या जर्सीमध्ये खेळण्याची ही पहिलीच वेळ नाही. लखनौचा संघ 2023 मध्ये मोहन बागानच्या जर्सीसारख्या रंगांची जर्सी घालून ( Football Club Mohan Bagan Jersey ) या संघाविरुद्ध खेळला होता. गेल्या वर्षी लखनौ संघ व्यवस्थापनाने ‘मोहन बागानचा वारसा आणि भारतीय फुटबॉलच्या इतिहासातील त्यांच्या योगदानाचे कौतुक करण्यासाठी’ ही जर्सी घातल्याचे सांगितले होते.
दरम्यान, आयपीएलच्या इतिहासात दोन संघांमधील आकडेवारी पाहिल्यास, लखनौ सुपरजायंट्सचा कोलकात्यावर वरचष्मा आहे. दोन्ही संघांमध्ये आतापर्यंत एकूण तीन सामने झाले असून कोलकाता संघाला एकही विजय नोंदवता आलेला नाही. गेल्या वेळी जेव्हा दोन्ही संघ ईडन गार्डन्सवर आमनेसामने आले तेव्हा लखनौने तो सामना एका धावेने जिंकला होता.
