मुंबई – खराब फॉर्मशी झुंजत असलेला दिल्ली कॅपिटल्सचा संघ आज IPL-16 मध्ये पहिला विजय मिळवण्यासाठी रॉयल चॅलेंजर्स बेंगळुरू विरुद्ध भिडणार आहे. हा सामना आरसीबीच्या होम ग्राउंड एम चिन्नास्वामी स्टेडियमवर होणार आहे. रॉयल चॅलेंजर्स बंगळुरूचा संघही गेल्या दोन सामन्यात पराभूत झाल्याने सलग तिसऱ्या पराभवाचा धोका त्यांना पत्करून चालणार नाही. त्यामुळे ते आपल सर्वस्व पणाला लावून यावेळी खेळणार.

दोन्ही संघांच्या आकडेवारीबद्दल बोलायचे झाले तर बेंगळुरूने दिल्लीविरुद्धचे ६२ टक्के सामने जिंकले आहेत. दोन्ही संघांमध्ये 29 सामने खेळले गेले आहेत. यातील 18 सामने बेंगळुरूने तर 10 सामने दिल्लीने जिंकले आहेत. एक सामना अनिर्णित ठरला आहे. बेंगळुरू येथील चिन्नास्वामी येथे दोन्ही संघ 11 वेळा आमनेसामने आले आहेत. यावेळी बेंगळुरूने सहा आणि दिल्लीने चार सामने जिंकले आहेत. एक सामना अनिर्णित आहे.

वॉर्नर फॉर्मात आहे पण संथ खेळी खेळत आहे
दिल्लीचा कर्णधार डेव्हिड वॉर्नरने या आयपीएलमध्ये आतापर्यंत सलग दोन अर्धशतके झळकावली आहेत. त्याने मुंबई इंडियन्सविरुद्ध 51 आणि राजस्थान रॉयल्सविरुद्ध 65 धावा केल्या, पण संघाला विजय मिळवता आला नाही. वॉर्नरशिवाय उपकर्णधार अक्षर पटेलनेही चांगली कामगिरी केली आहे, तर इतर खेळाडूंनी निराशा केली आहे.

संघ व्यवस्थापन खराब कामगिरीमुळे चिंतेत आहे. त्यासोबत बेंगळुरूचा कर्णधार फाफ डुप्लेसिसचा संघ आरसीबीही सततच्या पराभवामुळे त्रस्त आहे. डुप्लेसिस आणि माजी कर्णधार विराट कोहली यांनी संघाला चांगली सुरुवात करून दिली. ग्लेन मॅक्सवेलनेही संघाला मोठ्या धावसंख्येपर्यंत नेण्यात चांगले योगदान दिले, मात्र अखेरच्या षटकात संघाच्या गोलंदाजांची खराब कामगिरी महागात पडते.

डेथ ओव्हर बॉलिंग ही आरसीबीसाठी समस्या आहे
मोहम्मद सिराज आणि हर्षल पटेल हे वेगवान गोलंदाज सुरुवातीला विकेट घेण्यात यशस्वी होत असले तरी अखेरच्या षटकात धावा देत संघाचा पराभव होत आहे. श्रीलंकेचा फिरकी अष्टपैलू खेळाडू वानिंदू हसरंगा आरसीबीमध्ये सामील झाला आहे आणि संघ व्यवस्थापनाने गोलंदाजीची फळी मजबूत करण्यासाठी त्याला प्लेइंग इलेव्हनमध्ये समाविष्ट करणे अपेक्षित आहे.

संघाचे मनोबल वाढवण्यासाठी पंत पोहोचला
भारत आणि दिल्लीचा यष्टिरक्षक फलंदाज ऋषभ पंतही बेंगळुरूला पोहोचला आहे. तेथे त्याने आपला संघ दिल्ली कॅपिटल्सच्या प्रशिक्षण सत्रादरम्यान आपल्या सहकाऱ्यांना प्रोत्साहन दिले. दिल्ली आणि गुजरात दरम्यान झालेल्या मॅचमध्ये देखील पंत पहिल्यांदाच स्टेडियममध्ये दिसला होता. अपघातामुळे पूर्ण बरा झालेला नसल्याने सध्या तो टीम बाहेर आहे.

अशी असू शकते प्लेइंग-11
रॉयल चॅलेंजर्स बंगलोर: विराट कोहली, फाफ डुप्लेसिस (क), अनुज रावत/महिपाल लोमरोर, ग्लेन मॅक्सवेल, शाहबाज अहमद, दिनेश कार्तिक (विकेटकीपर), वानिंदू हसरंगा, डेव्हिड विली, हर्षल पटेल, कर्ण शर्मा, मोहम्मद सिराज.

दिल्ली कॅपिटल्स: डेव्हिड वॉर्नर (कर्णधार), पृथ्वी शॉ, मनीष पांडे, मिचेल मार्श, रिले रुसो/रोव्हमन पॉवेल, अक्षर पटेल, ललित यादव, अभिषेक पोरेल (यष्टीरक्षक), कुलदीप यादव, एनरिच नॉर्टजे, खलील अहमद/मुकेश कुमार.