International Women’s Day: दरवर्षी ८ मार्च रोजी जगभरात आंतरराष्ट्रीय महिला दिन साजरा केला जातो. हा दिवस केवळ शुभेच्छा देण्यापुरता मर्यादित नसून महिलांच्या अधिकार, समानता आणि सशक्तीकरणासाठी केलेल्या संघर्षाची आठवण करून देणारा दिवस आहे. समाजात महिलांना समान संधी मिळाव्यात आणि त्यांचा सन्मान वाढावा यासाठी हा दिवस महत्त्वाचा मानला जातो. २०२६ मध्ये आंतरराष्ट्रीय महिला दिन “Give to Gain” या संदेशासह साजरा केला जाणार आहे. याचा साधा अर्थ म्हणजे देणं म्हणजेच मिळणं. समाजाने महिलांच्या प्रगतीसाठी वेळ, संसाधने आणि पाठिंबा दिला तर त्याचा फायदा संपूर्ण समाजाला होतो, हा या मोहिमेचा मुख्य उद्देश आहे. यंदाच्या महिला दिनासाठी दोन महत्त्वाच्या संकल्पना मांडल्या गेल्या आहेत. पहिली म्हणजे संयुक्त राष्ट्रसंघाची अधिकृत थीम “Rights. Justice. Action. For All Women and Girls” आणि दुसरी म्हणजे जागतिक पातळीवरील “Give to Gain” ही मोहीम. या दोन्ही संकल्पनांचा उद्देश महिलांना समान हक्क मिळवून देणे आणि त्यांच्या विकासासाठी प्रत्यक्ष कृती करणे हा आहे. Give to Gain म्हणजे काय? (International Women’s Day) “Give to Gain” ही संकल्पना समाजात सकारात्मक बदल घडवण्यासाठी लोकांना प्रेरित करते. महिलांना शिक्षण, रोजगार, नेतृत्व आणि संधी मिळण्यासाठी समाजाने पुढाकार घ्यावा, असा यामागचा विचार आहे. एखाद्या महिलेला मदत केल्याने केवळ तिचे आयुष्य बदलत नाही, तर तिच्या कुटुंबावर आणि समाजावरही त्याचा सकारात्मक परिणाम होतो. यालाच ‘रिपल इफेक्ट’ असे म्हटले जाते. संयुक्त राष्ट्रसंघाची २०२६ ची थीम (International Women’s Day) संयुक्त राष्ट्रसंघाने यंदासाठी “Rights. Justice. Action. For All Women and Girls” ही थीम जाहीर केली आहे. या थीममध्ये केवळ महिलांच्या हक्कांबद्दल बोलणे पुरेसे नाही, तर ते हक्क प्रत्यक्षात लागू करणे आणि महिलांसाठी न्यायव्यवस्था अधिक मजबूत करणे यावर भर देण्यात आला आहे. शिक्षण, आरोग्य आणि नेतृत्वाच्या क्षेत्रात महिलांना येणाऱ्या अडथळ्यांना दूर करण्याचे आवाहनही या थीममधून करण्यात आले आहे. Happy Women’s Day 2026 महिला दिनाचा इतिहास आंतरराष्ट्रीय महिला दिनाचा इतिहास हा संघर्ष आणि चळवळींशी जोडलेला आहे. १९०८ साली अमेरिकेतील न्यूयॉर्क शहरात सुमारे १५ हजार महिलांनी मोर्चा काढून कमी कामाचे तास, चांगले वेतन आणि मतदानाचा अधिकार यासाठी आवाज उठवला होता. हा महिला हक्कांसाठीचा एक महत्त्वाचा टप्पा मानला जातो. यानंतर १९१० साली डेन्मार्कमधील कोपनहेगन येथे झालेल्या आंतरराष्ट्रीय परिषदेत समाजवादी नेत्या क्लारा झेटकिन यांनी महिला दिन जागतिक स्तरावर साजरा करण्याचा प्रस्ताव मांडला. हा प्रस्ताव स्वीकारण्यात आला आणि त्यानंतर अनेक देशांमध्ये महिला दिन साजरा होऊ लागला. १९१७ साली रशियातील महिलांनी “ब्रेड अँड पीस” या मागण्यांसाठी मोठा संप केला. या आंदोलनानंतर ८ मार्च हा दिवस महिला दिन म्हणून अधिकृतपणे ओळखला जाऊ लागला. नंतर १९७५ मध्ये संयुक्त राष्ट्रसंघानेही अधिकृतपणे हा दिवस साजरा करण्यास सुरुवात केली. आजही का महत्त्वाचा आहे हा दिवस? आजही जगभरात अनेक महिलांना समान वेतन, सुरक्षितता आणि नेतृत्वाच्या संधींसाठी संघर्ष करावा लागतो. त्यामुळे महिला दिन हा फक्त उत्सव नसून समाजातील असमानता दूर करण्याची आठवण करून देणारा दिवस आहे. यंदा ८ मार्चला केवळ शुभेच्छा देण्यापेक्षा “Give to Gain” या मंत्रानुसार एखाद्या मुलीच्या शिक्षणाला मदत करणे किंवा एखाद्या महिलेच्या करिअरला पाठिंबा देणे, हीच या दिवसाची खरी भावना आहे.
