Maharashtra Politics : राष्ट्रवादी काँग्रेस पक्षाचे नेते प्रफुल्ल पटेल यांनी शरद पवारांची रुग्णालयात जाऊन भेट घेताना केलेल्या एका वक्तव्यानंतर दोन्ही राष्ट्रवादी काँग्रेस पक्षाच्या विलिनीकरणाच्या चर्चांना पुन्हा एकदा उधाण आले आहे.

दोन्ही बाजूच्या बड्या नेत्यांकडून विलिनीकरणावर भाष्य केले जात असतानाच आता खासदार संजय राऊत यांनी एक मोठं विधान केले आहे.

“शरद पवार यांच्या पक्षाविषयी सातत्याने बातम्या पेरल्या जात आहे. जाणूनबुजून चर्चा घडवली जात आहे. शरद पवार भाजपसोबत कधीच जाणार नाहीत.” असे मोठं विधान संजय राऊत यांनी केले आहे.

पुरोगामी विचारधारेत गडबड होणार नाही

“पवार हे इंडिया आघाडीचे मजबूत स्तंभ आहेत. ते तसेच राहतील. कोणी कितीही अफवा पसरवल्या तरी त्यांच्या पुरोगामी विचारधारेत गडबड होणार नाही. इतक्या वर्षात झाली नाही. यापुढे होणार नाही, असेही संजय राऊत यांनी ठामपणे सांगितले.

शरद पवार यांची संजय राऊत यांनी देखील रुग्णालयात जाऊन भेट घेतली होती. या भेटीत त्यांनी पवारांच्या तब्येतीची विचारपूस केली आणि त्यांना बोथ कीर्तन हे त्यांचे पुस्तक भेट दिले. संजय राऊत म्हणाले “काल मी शरद पवार यांना भेटलो. चर्चा करू अशी त्यांची प्रकृती नाही. त्यांच्यावर उपचार सुरू आहेत.”

विलिनीकरणाच्या चर्चांवर बोलताना संजय राऊत म्हणाले “त्यांच्या पक्षाविषयी ज्या बातम्या सुरू आहेत. तो त्यांचा अंतर्गत विषय आहे. अजितदादा गटाच्या महायुतीत अडचणी आहेत. त्यांना मानसन्मान मिळत नाही. त्यामुळे त्यांना पवारांच्या नेतृत्तवात काम करायचे आहे.”

“शरद पवार हे गेली साठ वर्षे राजकारणात सक्रिय असून, त्यांच्याबरोबरच्या भेटीत नेहमीच राजकीय चर्चा होत असतात.” असेही संजय राऊत म्हणाले. त्यामुळे आता जो १० तारखेचा उल्लेख समोर आला आहे, तेव्हा मोठ्या राजकीय घडामोडी घडणार की आणखी काही वेगळं घडणार याकडे राजकीय वर्तुळाचे लक्ष लागले आहे.

SCO: भारताकडून पाकला SCO बैठकीसाठी निमंत्रण ; शहबाज शरीफने काय दिले उत्तर ? वाचा