वॉशिंग्टन – फ्रान्समध्ये करोनाचा प्रादुर्भाव पुन्हा वाढायला लागल्याने तेथे जाणे टाळावे, अशी सूचना अमेरिकेने आपल्या नागरिकांना केली आहे. फ्रान्समध्ये करोनामुळे रुग्णालयात दाखल होणाऱ्या रुग्णांची संख्या पूर्वीपेक्षा बरीच कमी आहे. मात्र सध्या फ्रान्समध्ये करोनाची चौथी लाट सुरू आहे. त्यामुळे अमेरिकेने फ्रान्सवर चौथ्या श्रेणीची प्रवासी बंदी घातली आहे. अमेरिकेच्या आघाडीच्या वैद्यकीय संस्था असलेल्या “युएस सेंटर फॉर डिसीज कंट्रोल’ने केलेल्या शिफारसीच्या आधारे ही प्रवास बंदी घालण्यात आली आहे. जर नागरिकांनी फ्रान्सला जायचे असेल तर पूर्ण लसीकरण होईल, याची काळजी घोतली जायला पाहिजे, असे “सीडीसी’ने म्हटले आहे. फ्रान्समध्ये करोनाच्या काळात आतापर्यंत 60लाख लोकांना करोनाचा संसर्ग झाला आहे. तर 1 लाख 11 हजार जणांचा मृत्यू झाला आहे. दैनंदिन करोना रुग्णांची संख्या 20 हजारांच्या आसपास आहे. पूर्वीपेक्षा करोना मृत्यूंचे प्रमाण आता बरेच कमी आहे. आतापर्यंत 7 कोटी 40 लाख लसींचे डोस देण्यात आले आहेत, असे जागतिक आरोग्य संघटनेने म्हटले आहे.
