Indus Waters Treaty ।  सिंधू पाणी कराराबाबत भारत एका मोठ्या योजनेवर काम करणार आहे. केंद्रीय ऊर्जा मंत्री मनोहर लाल खट्टर यांनी याविषयी महत्वाची माहिती दिली आहे. “जम्मू आणि काश्मीरमधील सुरुवातीच्या टप्प्यात असलेल्या जलविद्युत प्रकल्पांमध्ये अधिक पाणी साठवणुकीची योजना आखली जाईल परंतु आधीच पाइपलाइनमध्ये असलेल्या प्रकल्पांमध्ये कोणतेही बदल केले जाणार नाहीत कारण त्यांचे तांत्रिक तपशील अंतिम झाले आहेत” असे त्यांनी यावेळी म्हटले आहे. केंद्रीय मंत्री मनोहर लाल खट्टर यांनी, “यापैकी काही प्रकल्प जे अद्याप सुरुवातीच्या टप्प्यात आहेत, त्यात आपण अधिक पाणी साठवण्याची आणि वीज निर्मितीची योजना आखू शकतो “असे म्हटले आहे.

पहलगाम दहशतवादी हल्ल्यानंतर मोदी सरकारने सिंधू पाणी करार स्थगित करण्याचा निर्णय घेतला होता. या कराराअंतर्गत, जलविद्युत प्रकल्पांमध्ये जास्त पाणी साठवता येत नाही परंतु आता सरकार नवीन प्रकल्पांमध्ये साठवण क्षमता वाढवण्याची तयारी करत आहे. पंतप्रधान नरेंद्र मोदी यांनी राष्ट्राला उद्देशून केलेल्या भाषणात, “पाणी आणि रक्त एकत्र वाहू शकत नाही ” असे म्हटले होते. त्यानंतर सिंधू पाणी करार रद्द झाल्यानंतर पाकिस्तानची मोठ्या प्रमाणात आगपाखड झाली होती.

चार जलविद्युत प्रकल्पांना मंजुरी मिळाली Indus Waters Treaty । 
सध्या, जम्मू आणि काश्मीरमध्ये चार जलविद्युत प्रकल्प आहेत ज्यांना केंद्रीय विद्युत प्राधिकरणाने (CEA) मान्यता दिली आहे परंतु त्यांचे काम अद्याप सुरू झालेले नाही. यामध्ये सिंध नाल्यावरील न्यू गंदरबल (९३ मेगावॅट), चिनाबवरील किर्थई-II (९३० मेगावॅट) आणि सावलकोट (१,८५६ मेगावॅट) आणि झेलमवरील उरी-I फेज-II (२४० मेगावॅट) यांचा समावेश आहे.

सरकारला लवकर काम करायचंय  
एका इंग्रजी वर्तमानपत्राने दिलेल्या माहितीनुसार, केंद्र सरकार चिनाब-पाकल दुल (१,००० मेगावॅट), रतले (८५० मेगावॅट), किरू (६२४ मेगावॅट) आणि क्वार (५४० मेगावॅट) या चार जलविद्युत प्रकल्पांचे काम जलद गतीने पूर्ण करू इच्छित आहे. जम्मू आणि काश्मीरमध्ये बांधण्यात येणारा पाकल दुल हा पहिला साठवणूक आधारित जलविद्युत प्रकल्प आहे. पूर्ण झाल्यावर, त्याची पाणी साठवण क्षमता सुमारे १०९ दशलक्ष घनमीटर (एमसीएम) असेल आणि सप्टेंबर २०२६ पर्यंत ते कार्यान्वित करण्याचे लक्ष्य आहे.

सायबर हल्ल्यांना प्रतिसाद Indus Waters Treaty । 
केंद्रीय मंत्री यांनी यावेळी बोलताना, ऑपरेशन सिंदूर दरम्यान, पाकिस्तानने वीज क्षेत्रावर मोठ्या प्रमाणात सायबर हल्ले केले परंतु फायरवॉल बसवून त्यांना तोंड देण्यात आले.”अशी महती दिली. तसेच केंद्रीय मंत्री म्हणाले की, “सर्व प्रकल्पांसाठी सायबर सुरक्षा मजबूत केली जात आहे, मग ते ट्रान्समिशन असो, वितरण असो किंवा वीज निर्मिती असो.” तसेच जलविद्युत प्रकल्पांमध्ये वापरल्या जाणाऱ्या वस्तूंचीही तपासणी केली जात आहे कारण कोणीही सायबर हल्ला करण्याचा प्रयत्न करू शकतो असेही त्यांनी यावेळी सांगितले.

पाकिस्तानने भारताशी साधला संपर्क 
अलिकडेच पाकिस्तानने पुन्हा एकदा भारताशी संपर्क साधला होता आणि सिंधू पाणी कराराबाबत भारताच्या चिंता दूर करण्याची इच्छा व्यक्त केली होती. पाकिस्तानने पुन्हा एकदा केंद्रीय जलशक्ती मंत्रालयाला पत्र लिहिले होते, ज्यामध्ये त्यांनी पुन्हा चर्चा सुरू करण्याची ऑफर दिली होती. याशिवाय, दुशान्बे येथे झालेल्या हिमनदी संवर्धन परिषदेत परराष्ट्र राज्यमंत्री कीर्ती वर्धन सिंह म्हणाले होते की, पाकिस्तानने सीमापार दहशतवादाद्वारे सिंधू जल कराराचे सतत उल्लंघन केले आहे.

हेही वाचा
लॉस एंजेलिसमध्ये निदर्शकांनी लुटले अ‍ॅपल स्टोअर ; हिंसाचार अन् जाळपोळ, अनेक भागात कर्फ्यू लागू