pravesh Agrawal। indore : मध्य प्रदेशातील इंदूर शहरात गुरुवारी सकाळी भीषण आग लागून एक हृदयद्रावक दुर्घटना घडली. प्रसिद्ध कार शोअरूमचे मालक आणि काँग्रेस नेते प्रवेश अग्रवाल यांच्या घराला आग लागून त्यांचा दुर्दैवी मृत्यू झाला. या आगीत अग्रवाल यांची पत्नी आणि दोन मुली गंभीर जखमी असून, त्यांच्यावर रुग्णालयात उपचार सुरू आहेत. ही घटना इंदूरच्या लसूडिया परिसरातील सौम्या मोटर्स शोअरूमच्या वरच्या मजल्यावर असलेल्या पेंटहाऊसमध्ये घडली. प्राथमिक माहितीनुसार, आग घरातील स्वयंपाकघरातून लागली आणि काही क्षणांतच संपूर्ण घरात पसरली. आग लागल्याची माहिती मिळताच अग्निशमन दलाने घटनास्थळी धाव घेतली आणि सर्वांना रुग्णालयात हलवले. मात्र, डॉक्टरांनी प्रवेश अग्रवाल यांना मृत घोषित केले. त्यांच्या पत्नी रेखा अग्रवाल आणि मुली 14 वर्षांची सौम्या आणि 12 वर्षांची मायरा यांची प्रकृती गंभीर आहे. प्राथमिक तपासात असे समोर आले आहे की, पूजाघरातील अखंड ज्योतीमुळे आग लागली असावी. आग पसरल्यानंतर घरातील हाय-टेक इलेक्ट्रॉनिक सिक्युरिटी सिस्टीम बिघडली आणि सेंट्रल लॉक जाम झाला, ज्यामुळे घरातील लोक बाहेर पडू शकले नाहीत. धुरामुळे श्वास घुटमळल्याने प्रवेश अग्रवाल यांचा मृत्यू झाला. त्यांनी कुटुंबाला वाचवण्याचा प्रयत्न केला, पण स्वतःला वाचवू शकले नाहीत. गार्ड्स होते तरीही मदत मिळाली नाही : अपघाताच्या वेळी इमारतीत सुरक्षा रक्षक उपस्थित होते, पण त्यांनी योग्य वेळी मदत केली नाही, अशी माहिती मिळाली आहे. प्रवेश अग्रवाल यांचे इंदूरसह महाराष्ट्र आणि गुजरातमध्ये अनेक ऑटोमोबाईल एजन्सी आहेत. ते माजी मुख्यमंत्री कमलनाथ यांचे निकटवर्तीय होते आणि त्यांनी ‘नर्मदा युवा सेना’ ही संघटना स्थापन केली होती. माजी मुख्यमंत्री कमलनाथ यांनी एक्स (ट्विटर) वर पोस्ट करत शोक व्यक्त केला आहे. “इंदूरमध्ये लागलेल्या आगीत काँग्रेस नेते प्रवेश अग्रवाल यांचा मृत्यू आणि त्यांच्या पत्नींची गंभीर अवस्था याबद्दल अत्यंत दुःख झाले आहे. अग्रवाल काँग्रेसचे निष्ठावान कार्यकर्ते होते. त्यांच्या आत्म्यास शांती लाभो आणि परिवारातील इतर सदस्य लवकर बरे होवोत.” ही घटना इंदूरसह संपूर्ण मध्य प्रदेशात हळहळ व्यक्त करणारी ठरली आहे.
