inflation rises : देशातील घाऊक महागाई दराने (WPI) सर्वसामान्यांची चिंता वाढवली असून जानेवारी महिन्यात हा दर १.८१ टक्क्यांवर पोहोचला आहे. महागाईत झालेली ही सलग तिसरी वाढ असून, प्रामुख्याने अन्नपदार्थ आणि बिगर-खाद्य वस्तूंच्या किमती वाढल्याने हा परिणाम दिसून आला आहे. उद्योग मंत्रालयाने सोमवारी ही अधिकृत आकडेवारी जाहीर केली. डिसेंबरच्या तुलनेत मोठी झेप – गेल्या वर्षी म्हणजेच जानेवारी २०२५ मध्ये घाऊक महागाईचा दर २.५१ टक्के होता. मात्र, डिसेंबर २०२५ मध्ये हा दर ०.८३ टक्क्यांपर्यंत खाली आला होता. आता अवघ्या एका महिन्यात त्यात पुन्हा मोठी वाढ झाली आहे. बिगर-खाद्य वस्तू आणि भाज्या महागल्या – मंत्रालयाने दिलेल्या माहितीनुसार, बिगर-खाद्य वस्तूंच्या श्रेणीत महागाईने मोठी उसळी घेतली आहे. डिसेंबरमध्ये २.९५ टक्के असलेला हा दर जानेवारीत थेट ७.५८ टक्क्यांवर पोहोचला आहे. डिसेंबरमध्ये अन्नपदार्थांच्या किमतीत ०.४३ टक्क्यांची घसरण झाली होती, मात्र जानेवारीत हा दर १.५५ टक्के नोंदवला गेला. भाज्यांच्या दरात मोठी वाढ झाली असून, डिसेंबरमधील उणे ३.५० टक्क्यांच्या तुलनेत जानेवारीत हा दर ६.७८ टक्के झाला आहे. मॅन्युफॅक्चर्ड प्रॉडक्ट्समधील महागाई २.८६ टक्क्यांवर पोहोचली आहे. वाढीची मुख्य कारणे – उद्योग मंत्रालयाने स्पष्ट केले की, धातूंचे उत्पादन (Basic Metals), वस्त्रोद्योग, अन्नपदार्थ आणि इतर उत्पादित वस्तूंच्या किमती वाढल्याने घाऊक महागाईचा निर्देशांक उंचावला आहे. दुसरीकडे, इंधन आणि वीज क्षेत्रातील महागाई दरात घसरण सुरूच असून हा दर ४.०१ टक्के राहिला आहे. रिझर्व्ह बँकेची भूमिका महत्त्वाची – गेल्या आठवड्यात जाहीर झालेल्या आकडेवारीनुसार, देशातील किरकोळ महागाई दर (Retail Inflation) देखील जानेवारीत वाढून २.७५ टक्क्यांवर पोहोचला आहे. भारतीय रिझर्व्ह बँक (RBI) व्याजदरांचे धोरण ठरवण्यासाठी प्रामुख्याने किरकोळ महागाईचा विचार करते. दरम्यान, चालू आर्थिक वर्ष २०२५-२६ मध्ये रिझर्व्ह बँकेने आतापर्यंत रेपो रेटमध्ये १.२५ टक्क्यांची कपात केली असून, सध्या हा दर ५.२५ टक्के इतका आहे.
