India’s 58th richest man: बॉलीवूडमध्ये काही कलाकार असे आहेत, ज्यांनी काही मोजक्याच चित्रपटांमध्ये काम करून नंतर चित्रपटसृष्टी सोडून वेगळा मार्ग निवडला. अशाच कलाकारांपैकी एक म्हणजे स्वदेस चित्रपटातील शाहरुख खानची हिरोईन गायत्री जोशी.

गायत्री जोशीने २००० साली फेमिना मिस इंडिया इंटरनॅशनल किताब जिंकला होता आणि त्याच वर्षी मिस इंटरनॅशनल स्पर्धेत भारताचं प्रतिनिधित्व केलं होतं. २००४ मध्ये ती आशुतोष गोवारीकर दिग्दर्शित स्वदेस या चित्रपटात शाहरुख खानसोबत झळकली. मात्र या चित्रपटानंतर तिने अभिनय क्षेत्र सोडले.

२००५ मध्ये गायत्रीने उद्योगपती विकास ओबेरॉय यांच्याशी विवाह केला. सध्या ती ओबेरॉय रिअल्टी या कंपनीत महत्वाच्या पदावर कार्यरत आहे.

दरम्यान, नुकतीच जाहीर झालेल्या हुरुन रिच इंडिया लिस्ट २०२५ मध्ये विकास ओबेरॉय यांची निवड देशातील श्रीमंत उद्योगपतींमध्ये झाली आहे. त्यांची एकूण संपत्ती तब्बल ४२,९६० कोटी रुपये असून या यादीत ते ५८ व्या स्थानावर आहेत.

ओबेरॉय रिअल्टीचे चेअरमन व मॅनेजिंग डायरेक्टर म्हणून त्यांचा व्यवसाय रिअल इस्टेट क्षेत्रात मोठा आहे. मुंबईतील ‘३६० वेस्ट’ हा त्यांचा प्रीमियम प्रकल्प विशेष चर्चेत आहे, जिथल्या एका फ्लॅटची किंमत जवळपास ४०० कोटी रुपये आहे. याशिवाय ओबेरॉय रिअल्टीकडे वेस्टिनसारखी लक्झरी हॉटेल्स आणि अनेक प्रीमियम प्रकल्प आहेत.

विशेष म्हणजे, विकास ओबेरॉय यांची संपत्ती बॉलीवूडमधील टॉप ५ श्रीमंत कलाकारांच्या एकत्रित संपत्तीपेक्षाही जास्त आहे. शाहरुख खान, जुही चावला, हृतिक रोशन, करण जोहर आणि बच्चन कुटुंब या पाच जणांची एकत्रित संपत्ती सुमारे २५,९०० कोटी रुपये आहे, तर विकास ओबेरॉय एकटेच ४२,९६० कोटी रुपये संपत्तीचे मालक आहेत.