Sharmila Tagore Birthday: बॉलिवूडची सदाबहार, देखणी आणि रॉयल व्यक्तिमत्त्वाची नायिका शर्मिला टागोर आज आपला 81 वा वाढदिवस साजरा करत आहेत. 1946 मध्ये हैदराबाद येथे जन्मलेल्या शर्मिलांनी आपल्या सौंदर्याने, अभिनयाने आणि व्यक्तिमत्त्वाने 60-70 च्या दशकात चित्रपटसृष्टीवर अधिराज्य गाजवले. शशी कपूर, राजेश खन्ना, देव आनंद, धर्मेंद्र अशा त्या काळातील सर्व मोठ्या अभिनेत्यांसोबत त्यांनी काम केले आणि स्वतःची वेगळी ओळख निर्माण केली.

शर्मिलांनी 1964 मध्ये आलेल्या ‘कश्मीर की कली’ या चित्रपटातून बॉलिवूडमध्ये पदार्पण केले. ही भूमिका आधी आशा पारेख यांना ऑफर झाली होती, परंतु त्यांनी नकार दिल्यानंतर ती शर्मिलांच्या वाट्याला आली आणि हीच फिल्म त्यांच्या करिअरचा सर्वात मोठा टर्निंग पॉईंट ठरली. त्यांच्या गोड चेहऱ्यानं, स्क्रीन प्रेझेन्सनं आणि निरागस अभिनयानं पहिल्याच चित्रपटात प्रेक्षकांना भुरळ घातली.

शशी कपूरवर होता क्रश

शर्मिला टागोर आणि शशी कपूर यांनी एकूण 9 चित्रपटांत एकत्र काम केले. ‘आ गले लग जा’, ‘आमने-सामने’, ‘दूर देश’ हे त्यातील खास आठवणीतले चित्रपट. शशी कपूरसोबत काम करताना त्यांच्यावर स्वतःला क्रश असल्याचे शर्मिलांनी अनेकदा मुलाखतींत सांगितले आहे. मात्र ही भावना फक्त आवडीपुरतीच राहिली.

राजेश खन्नासोबतची सुपरहिट जोडी

शर्मिला टागोर आणि राजेश खन्ना यांची जोडी 70 च्या दशकात हिटची गॅरंटी मानली जात होती. ‘आराधना’, ‘अमर प्रेम’, ‘सफर’ या फिल्म्सने त्यांना अभूतपूर्व लोकप्रियता मिळवून दिली. या यशानंतर त्या उद्योगातील सर्वाधिक मानधन घेणाऱ्या अभिनेत्रींपैकी एक बनल्या. 1966 ते 1969 या काळात त्या मुमताजसोबत सर्वात जास्त फी घेणाऱ्या हिरोइन्समध्ये गणल्या जात होत्या.

पटौदींचे नवाब मंसूर अली खान यांच्यावर जडले प्रेम

चित्रपटसृष्टीत असतानाच त्यांचे मन क्रिकेट सुपरस्टार आणि पटौदी घराण्याचे नवाब मंसूर अली खान पटौदी यांच्यावर आले. प्रेम इतके वाढले की दोघांनी लग्नासाठी धर्मपरिवर्तन करण्याचा निर्णय घेतला. त्यानंतर शर्मिला आयशा बेगम बनल्या. त्यांच्या संसारात सैफ अली खान, सोहा अली खान आणि सबा अली खान या तीन मुलांचा जन्म झाला.

आज आहेत हजारो कोटी संपत्तीच्या मालकीण

शर्मिला टागोर केवळ त्यांच्या अभिनयासाठीच नव्हे, तर त्यांच्या  रॉयल लाइफस्टाइलसाठीही नेहमी चर्चेत राहतात. उपलब्ध माहितीनुसार, त्या आज सुमारे 2700 कोटी रुपयांच्या संपत्तीच्या मालकीण आहेत. ही रक्कम त्यांच्या राजेशाही जीवनशैलीची आणि पटौदी घराण्याच्या परंपरेची जिवंत साक्ष देते.

शर्मिला टागोर यांनी बॉलिवूडला दिलेली नाजूकता, साधेपणा आणि सौंदर्य आजही लाखो चाहत्यांच्या मनात तेवढ्याच प्रेमाने जपलेले आहे. आज त्यांच्या वाढदिवसानिमित्त त्यांच्या चाहत्यांकडून शुभेच्छांचा वर्षाव होत आहे.