India-Poland : भारत आणि पोलंडने 2030 पर्यंत दोन्ही देशांमधील व्यापार दुप्पट करण्याचे लक्ष्य ठेवले आहे. सध्या भारत-पोलंडदरम्यान सुमारे 6.3 अब्ज डॉलरचा व्यापार होतो. पंतप्रधान नरेंद्र मोदी आणि पोलंडचे पंतप्रधान डोनाल्ड टस्क यांच्या भेटीनंतर दोन्ही देशांनी चार करारांवर स्वाक्षऱ्या केल्या.

संरक्षण क्षेत्रातील सहकार्य वाढवण्यासाठी ‘डिफेन्स इंडस्ट्री डायलॉग’ सुरू करण्याचा निर्णयही झाला. याद्वारे दोन्ही देश संरक्षण उपकरणांचे एकत्रित उत्पादन आणि विकास करू शकतील. गोपनीय माहितीच्या सुरक्षित देवाणघेवाणीसाठीही करार करण्याची तयारी सुरू आहे.

युक्रेनमध्ये शांततेसाठी भारताची भूमिका –

युक्रेनसोबत पोलंडची 530 किलोमीटरची सीमा आहे. युक्रेन युद्धाच्या पार्श्वभूमीवर टस्क भारत दौऱ्यावर आले आहेत. चर्चेनंतर मोदी यांनी भारत शांततेसाठीच्या अर्थपूर्ण प्रयत्नांना मदत करेल, असे सांगितले. युद्धाचा परिणाम अन्न आणि ऊर्जा सुरक्षेवर होत असून त्याचा फटका ग्लोबल साऊथ देशांना बसत असल्याचे दोन्ही नेत्यांनी नमूद केले.

संरक्षण क्षेत्रात मोठ्या संधी –

पोलंड संरक्षण क्षेत्रात मोठी गुंतवणूक करत आहे. युरोपियन युनियनच्या SAFE योजनेतून पोलंडला 43.7 अब्ज युरो मिळणार आहेत. या निधीपैकी 35 टक्के रक्कम परदेशातील संरक्षण उत्पादनाशी संबंधित गुंतवणुकीसाठी वापरता येणार आहे. भारतातही गुंतवणुकीच्या शक्यता आहेत.

मोदी यांनी संरक्षण, अंतराळ आणि अणुऊर्जा क्षेत्रात सहकार्य वाढवण्याचे सांगितले. तसेच पोलंडच्या कंपन्यांनी भारतासोबत विकास आणि उत्पादन क्षेत्रात भागीदारी करावी, असे आवाहन केले. महत्त्वाची खनिजे आणि कोळशापासून गॅस निर्मिती तंत्रज्ञानातही सहकार्य वाढवण्याची तयारी आहे.

रेल्वे, खाणकाम आणि अंतराळात सहकार्य –

दोन्ही देशांतील कंपन्यांनी अंतराळ, रेल्वे, खाणकाम आणि कोळसा गॅसीकरण क्षेत्रात सुमारे सहा व्यावसायिक करार केले. टस्क यांच्यासोबत पोलंडचे अर्थमंत्री आंद्रेज डोमान्स्की आणि सुमारे 100 व्यावसायिक भारतात आले आहेत. टस्क शुक्रवारी बंगळुरूला जाणार असून तेथे आयटी आणि अंतराळ क्षेत्रातील कंपन्यांच्या प्रतिनिधींशी चर्चा करतील.

सेमीकंडक्टर, बॅटरी पुनर्वापर, सर्क्युलर इकॉनॉमी आणि दुर्मीळ खनिजांच्या प्रक्रियेतील सहकार्यावरही चर्चा झाली. खाण क्षेत्रातील एका करारावर चर्चा सुरू आहे. दोन्ही देशांमध्ये थेट विमानसेवा वाढवण्याच्या पर्यायांचाही विचार केला जात आहे.

भारताच्या निर्यातीला मिळू शकतो फायदा –

भारत आणि युरोपियन युनियनमधील मुक्त व्यापार करार (FTA) झाल्यास व्यापाराच्या नव्या संधी निर्माण होऊ शकतात. मोदी यांच्या मते, यामुळे भारतातून पोलंडला यंत्रसामग्री, रसायने, प्लास्टिक आणि अभियांत्रिकी वस्तूंची निर्यात वाढू शकते. रेल्वे, वाहतूक, आधुनिक उत्पादन, अन्नप्रक्रिया आणि जैवतंत्रज्ञान क्षेत्रात पोलंडकडून भारतात गुंतवणूक आणण्याचे प्रयत्न केले जातील.

दोन्ही नेत्यांनी भारत-EU मुक्त व्यापार करारावर लवकर स्वाक्षरी आणि अंमलबजावणी करण्यावर भर दिला. पोलंडची अर्थव्यवस्था 1 ट्रिलियन डॉलरवर पोहोचल्याबद्दल मोदी यांनी टस्क यांचे अभिनंदन केले. भारताची अर्थव्यवस्थाही मजबूत असल्याचे सांगताना त्यांनी मागील तिमाहीतील GDP वाढ 7.8 टक्के असल्याचे नमूद केले.